WILLEMSTAD.- Gerensia di kompania CORC a manda un karta na presidente di parlamentu ku un petishon pa un reunion ku tur parlamentario. Den e karta Manoel De Silva De Freitas komo direktor di CORC i Javier Hernandez, tambe komo direktor di CORC, ta skirbi ku refineria ta wòrdu konsiderá komo un dje pilarnan fuerte den nos ekonomia i a ser menshoná den akuerdo di gobernashon 2021-2025 komo un tema di atenshon. Segun e dos direktornan CORC tin 1 aña den preparashon i proseso pa logra start e refineria bek. Nan ta ‘superando diferente opstákulo’. Pero e meta di CORC segun e dos direktoranan ta ‘pa mantené i krea mas kupo di trabou konsekuentemente halsa nivel di bida i un ekonomia mas stabil’. Mas aleu e direktornan ta skirbi ku ‘CORC ta konvensí ku huntu nos lo logra superá tur e retonan ku falta i finalmente start e refineria bèk.’ Direktiva di CORC ta hasi un petishon na presidente di parlamentu Charetty America-Fransisca ‘pa organisá un reunion ku tur parlamentu mas pronto ku ta posibel. CORC lo probechá di sera konosí ku miembronan di parlamentu i duna informashon di e proseso ku ta andando.’
E karta ta remarkabel pasobra Refineria di Kòrsou (RdK), pa medio di Curaçao Refinery Utilities (CRU), algun dia pasa a manda un karta na su trahadónan. Den e karta nan ta informá ku ta bai atendé desaroyonan pa loke ta trata e refineria di Kòrsou na otro manera. Trahadónan den servisio fiho a haña proposishon pa firma un kontrakt pa finalisá e akuerdo di trabou na 30 di sèptèmber awor. Esnan ku no firma ta nifiká ku RdK mes lo kuminsá e proseso na SOAW pa pidi nan retiro. RdK i CRU no por sigui ku trahadónan den servisio fiho pa operá partinan di e refineria pasobra esaki ta nifiká pèrdidanan kuantioso. Ta 18 luna kaba e situashon aki ta kanando.
Den e karta ta skirbi tambe ku: ‘Tanten ta sigui pendiente ku e grupo CORC pa wak si nan ta kla pa tuma operashon i maneho di e refineria.’
Manera ta konosí a firma akuerdo na mei último ku ta trahando riba traspaso pa CORC ‘pero ainda CORC no a kumpli p’esei e traspaso no por a tuma lugá’.