Ta spera di por konkluí ku akuerdo final pa fin febrüari

WILLEMSTAD.-Den un informe ofisial CURACAO OIL REFINERY COMPLEX(CORC BV) a anunsiá ku nan a risibí invitashon di Refineria di Kòrsou (RdK) pa negoshá, di forma eksklusivo, tokante un akuerdo definitivo pa CORC tuma riba dje operashon di Refineria Isla, e fasilidatnan di e haf na Emmastad i di e Terminal na Bullenbaai (COT). CORC ta sumamente orguyoso ku, den su kalidat di e partido lokal den e proseso, a selekshon'é. E desishon akí di RdK ta suprayá sosten ku empresarionan lokal ta meresé, pa yuda krea mayor bienestar na nos isla i  kuponan di trabou.

CORC ta un entidat 100% di Kòrsou, establesí na Kòrsou, ku tin komo akshonistanan Dick en DOOF, huntu ku e sindikatonan konhunto PWFC i APRI. Ademas, CORC a risibí kaba partisipashon di gran embergadura di señor Javier Hernandez, un eksperto mundialmente rekonosí riba tereno di refinashon di petroli i eks CEO di e kompleho di e refineria.

CORC a kompromet'é pa mantené i mehorá kondishonnan laboral di su personal, gradualmente mehorá kondishonnan ambiental pa finalmente logra e mihó normanan internashonal i sigurá sostenibilidat na largo plaso di e operashonnan di refinashon. CORC ta ansioso pa konkluí un akuerdo final ku RdK na fin di febrüari 2021.