Despues di dos empleado positivo

WILLEMSTAD.-Informashon ku a yega mesa di redakshon di EXTRA awe mainta ta indiká ku a konstatá trahadónan di Corendon Hotèl infektá ku Covid-19. Den kombersashon ku EXTRA a hiba ku un funshonario di e Hotèl el a splika ku bèrdat nan a hana dos (2) empleado ku a test positivo pa Covid. Ta trata di dos empleado ku den seno familiar tabata den kontakto ku hendenan infektá. Komo konsekuensia di e desaroyo aki Corendon Curaçao a aktivá nan plan di emergensia.

E dos empleadonan, for di momentu ku a bira konosí ku den nan ambiente familiar tin hende ku  test positivo a pone ku a laga e empleadonan aki tambe bai test. Na momentu ku nan test a Sali positivo e empleadonan aki a bai karentena. E plan di emergensia di Corendon Curaçao ta enserá ku a harma un espasio spesial na e Hotèl mes unda ta por test trahadónan. A kuminsá test trahadónan ku por tabata den kontakto direkto ku e dos empleadonan ayera, sinembargo entrante awe djabièrnè a kuminsá test tur hende, asina Edward Suares funshonario di Corendon Curaçao a deklará na EXTRA.

Pues kuminsando awe te djaluna ta test tur trahadó tur e dianan aki promé ku nan bai traha. Suares ta splika ku den e industria di turismo nan mester pèrkurá pa sigui protokòlnan di higiena hopi rígido. E Hotèl tin turista awor aki i mester protehá esnan ku tei, esnan ku ta bini den futuro i tambe tur hende ku ta gana nan pan di kada dia den e Hotèl. E funshonario tin komprenshon si kisas un trahadó ta haña e kontrol tur dia un molèster, pero mester korda ku esaki ta pa e bienestar di empleadonan prinsipalmente pasobra si e Hotèl sera i no por sirbi turistanan ta tur hende ku ta gana nan pan lo sinti esei. Korsou a atendé Covid hopi bon i awor mester kuida pa asina por habri bèk pa ekonomia por floresé. Mas detaye den edishon di EXTRA.