WILLEMSTAD.- Fabien Cousteau i PROTEUS™ Ocean Group ta trahando ku Map the Gaps i R2Sonic pa den transkurso di un siman marka e área marina ku ta protehá, kual ta kubri un superfisie total di 1.482 hèktar di ref i 1077 hèktar di bahia interior na Kòrsou. P’esei Cousteau ta na Kòrsou e dianan aki.
Map the Gaps ta un organisashon benéfiko, formá pa profeshonalnan ku ta studia mapanan geográfiko di laman, studiantenan i sosionan di e industria ku tin e kompromiso na konsientisashon i diversidat di mapanan di oséanonan. R2Sonic ta ofresé ‘multibeam echo sounders’ di teknologia avansá ku ta brinda detayenan di kalidat i ku ta dediká pa yuda kolektá i kompartí informashon ku nos tur por siña for di dje di e tereno di nos oséanonan. Huntu e organisashonnan aki ta trese informashon vital i un base di konosementu mas profundo pa benefisiá Kòrsou, pèrmitiendo medidanan di protekshon duradero.
Tambe e lo trese informashon balioso pa un sitio unda mester ubiká e promé PROTEUS™, kual lo keda stashoná dilanti kosta di Kòrsou na un profundidat di 60 pia, den un
área protehá bou di laman.
Map the Gaps ta kontentu di por tin e oportunidat di por trese huntu un tim ku ta konsistí di spesialistanan di mapa geográfiko di region pa hasi un mapa di e área protehá bou di laman na Kòrsou. ‘E konosementu ku nos trabou lo kontribuí na eksplorashon di e sitio, buskando un habitat supmarino humano i ku e inisiativa importante aki lo tin un impakto duradero di nos oséano, ta algu sumamente emoshonante”, asina Tim Kearns fundadó di Map the Gaps a bisa. R2Sonic a komentá: ‘Nos ta emoshoná di ta partisipá den trahamentu di mapa di e área supmarino dilanti di e kosta di Kòrsou, unda PROTEUS™ lo konstruí su habitat humano supmarino. E estudio hidrográfiko ta na e orígen di asina tantu aktividatnan ku ta duna un empuhe na prosperidat ekonómiko i ta yuda nos komprondé nos ekosistema. Pa nos yuda ku nos promé liña di ‘multibeam echo sounders’, Sonis 2026, i tambe pa yuda realisá un investigashon hidrográfiko ta nos manera di kontribuí na desaroyo di e proyekto aki ku lo ta e pionero den nos komprondementu di un habitat bou di laman.”
‘Nos ta masha honrá di tin Kòrsou komo hogar di PROTEUS™, siendo un isla rekonosé mundialmente pa su laman puru i su bida marina diferente. Nos ta duna e tim embolbí ku e proyekto aki tur nos apoyo i nos ta komprometé ku e vishon i partnership, sirbiendo komo atministradónan di medio ambiente. Esaki ta un proyekto impreshonante i importante pa siensia i mundu i futuro di nos ekosistema asina frágil, yen di rikesa ku ainda mester keda deskubrí.
Kòrsou ta pashoná ku salú di nos oséanonan i lo sigui defendé e tipo aki di investigashon i proyektonan di e magnitut aki”, asina Hugo Clarinda direktor athunto di Ofisina di Turismo di Kòrsou a deklará.
Ta antisipá ku PROTEUS™ lo bira kuater bia e tamaño di kualke habitat anteriormente konosí, i ku lo e konta ku laboratorionan di último generashon, espasionan pa drumi i un pisina lunar, ku ta e sitio bou di e stashon unda bushinan i instrumentonan por bai den awa. Komo esun promé na mundu, PROTEUS™ lo tin un ‘broeikas’ na bordo ku ta permití e abitantenan pa planta nan propio kuminda i di e forma ei ta eliminá un di e desafionan di biba bou di laman, kual ta kushiná
ku kandela.
E habitat lo tin koriente for di fuentenan natural manera solo i bientu. Ademas lo tin un fasilidat di produkshon di video na bordo di manera ku por por tin ‘live streaming’ kontinuo ku ta esensial pa enseñansa. Esaki ta pone ku partnernan rònt mundu lo por sigui di forma virtual,ku imágennan bibu, tur loke ta pasando. Asina aki e historia di PROTEUS™ por plama pa
mundu hinter pa asina komunidatnan por ta embolbí ku nos oséanonan.
Durante di su bishita na Kòrsou Fabien a reuní ku vários abitante i tambe miembronan di e gobièrnu, inkluso a bishita despacho di Minister di Edukashon. Durante di e bishita inisial aki a papia riba e oportunidatnan di konsientisashon di oséano i programashon i alkanse edukativo.
Sr. Sithree van Heydoorn, minister di Edukashon a komentá: ‘E markamentu di e sitio ta e
próksimo stap emoshonante den e konstrukshon di PROTEUS™, ku lo permití akseso sin presedente na mas i mihó komprondementu di oséano. Pa medio di e desaroyo aki, nos lo por siña di e biodiversidat di laman na Kòrsou na nivel lokal i eduká nos komunidat mas ainda riba e konekshon entre humano i oséano”.