WILLEMSTAD.- E pandemia di COVID-19 sin duda ta plamando tur kaminda aki na Kòrsou. Na porta di Wardakosta tambe e pandemia aki a yega.

For di fuentenan digno di krédito EXTRA a komprondé ku COVID-19 a invadí na porta di Wardakosta i a praktikamente pone esaki plat. Esaki a bini debí ku mayoria trahadó di Wardakosta ta infektá ku COVID-19.

EXTRA a tuma kontakto ku bosero di Wardakosta sra. Shalick Clement. Sra. Clement a konfirmá ku en bèrdat tin algun trahadó infektá. E situashon aki a pone ku Wardakosta tabatin ménos personal. A buska un plan B i a pidi refuerso di e personal di Milisia ku ta kapasitá pa por duna Wardakosta un man di manera ku nos kosta nan ta keda mesun bon vigilá manera semper.

Tambe EXTRA a komprondé ku e kontagio a inisiá serka dos personal ku por sierto tin rango haltu. E koleganan aki a tèst positivo pero a opta pa sigui laborá manera nada a pasa (nan nòmber ta konosí pa EXTRA). Riba e informe aki sra. Clement a indiká ku e no por konfirmá ni desmentí.

Si sra. Clement a pone hopi énfasis ku seguridat di nos kostanan no ta na peliger. A sòru di remplasá falta di e personal di un forma adekuá. Aparte di esaki a i lo sigui tuma medidanan sigun gobièrnu a stipulá. Sigur awor ku e kantidat di kasonan aktivo na Kòrsou. Wardakosta tin protokòl i diferente otro kosnan “in place” pa tene ofisina i e personal mas seif posibel. 100% no por evitá e kontagio ku COVID, esei ta un echo, segun Clement.