WILLEMSTAD.- Epidemiólogo dr. Izzy Gerstenbluth djaluna último a splika ku na Kòrsou fin di siman a hasi 92 tèst. For di 92 tèst djadumingu último a resultá seis (6) kaso positivo. ‘E no ta zona manera hopi. Pero mi ta remarká ku bou di 92 tèst, un total di 6 nobo ta kasi shete porshento.’ Asina Gerstenbluth a splika djaluna último durante konferensia di prensa di gobièrnu di Kòrsou. Segun e hefe di departamento di Epidemiologia ‘target’ di Kòrsou ta no mas ku 5 porshento di e tèst ta sali positivo.
Gerstenbluth a bisa tambe ku den total kuater persona (4) djadumingu último a ser saká for di isolashon. Esei kier men ku nos tin 114 hende ku ta positivo. Tin kuater hende na hospital di kual unu ta den intensive care. Gerstenbluth: ‘I manera ta konosí nos tin lástimamente 22 hende ku ku a fayesé pa motibu di COVID-19.’
Gerstenbluth a splika ku e sifranan den e último simannan tabata hopi bon. ‘Asta siman pasá a papia pa sigui relahá e medidanan ku nos a tuma. Pero un par di kos a pasa’, Gerstenbluth a splika. Segun e epidemiólogo den e último luna te 5 di mart ‘nos a hasi un tiki mas di 7000 tèst’. Gerstenbluth: ‘Di e 7000 hendenan ku a tèst, 155 a tèst positivo. Ku ta nifiká ku e porsentahe di tèst ku a sali positivo (“positivity rate’’) ta alrededor di 2.06 porshento. Ku ta hopi bon. Pero den e último sinku dianan nos a tèst alrededor di 1600 hende. Anto di e 1600 hende 74 a sali positivo. Esei ta nifiká ku den sinku dia mitar a sali positivo kompará ku e luna promé.’ Gerstenbluth ta splika ku e kantidat di tèst positivo a subi hopi. ‘E sifra ta mustra ku e kantidat di hende ku a tèst positivo den e último dianan a subi na un manera signifikante. Hopi lihé, hopi rápido.’ Gerstenbluth a splika ku tambe a wak si Kòrsou ta konosé mas kaso di un di e variante nobo di COVID-19. Algun di nan ta plama hopi mas lihé, bou di nan ta e variante britániko. E variante ta preokupante pasobra nan ta transmití hopi mas lihé. ‘Anto si e vírus ta transmití hopi mas lihé den bo komunidat. Esaki ta nifiká ku den un korto tempu mas hende lo kontagiá. Esei kier men ku hende ku ta mas vulnerabel tambe ta kore mas riesgo. Ku ta nifiká ku mas hende lo wòrdu atmití den hospital i mas hende lo fayesé.’ Gerstenbluth a splika ku e variante britániko ta na Boneiru kaba i tambe na Aruba. I e ta konta pa Kòrsou tambe. Algun siman pasá a detektá dos kaso di e variante nobo na Kòrsou. ‘Pero ora bo ta detektá dos, bo sa ku tin mas. Pasobra e ta transmití mas lihé.’ Mas aleu Gerstenbluth a splika ku djasabra último a bin resultado di 32 tèst ku Kòrsou a manda Hulanda. E tèst a wòrdu trahá entre 16 i 21 febrüari. Den total 75 porshento di e tèstnan a sali positivo ku e variante nobo britániko ku ta plama lihé. Esei por aklará e plamamentu hopi lihé den e último dianan na Kòrsou, segun Gerstenbluth. I tambe e ta motibu pa tuma medidanan lihé. ‘Nos no por warda mas.’