WILLEMSTAD.- Hustamente aki dos siman ta e fecha kaminda mester duna inisio na benta di vürwèrk pa fin di aña. Manera EXTRA a anunsiá algun siman atras, e interes pa personanan bende vürwèrk ku nan stènt òf negoshi tabata hopi haltu.

E mesun hendenan di aña pasá a bolbe duna nòmber inkluso algun nòmber nobo a bini aserka. Pero mirando kon e situashon di COVID riba nos isla a desaroyá durante di e último dianan, algun persona tòg a hala atras. Manera e situashon ta awor aki no ta bale la pena bai riska kurpa sabiendo ku ta kore e riesgo di e.o pèrdè sèn.

Personanan ta den nan kas for di trempan i e esfera di di fin di aña no tei manera añanan anterior. Hendenan no por ni bisa ku nan ta bai sali i kore wak e diferente shownan pasó no tin esei tampoko e aña aki. Huntu ku esakinan hende ta pensa dos tres bia promé nan saka un sèn èkstra. Apesar di esakinan tur preparativo ta sigui pa esnan ku si ta bai bende.

Djabièrnè último a tèst tur e vürwèrknan ku ya a yega Kòrsou, i tur kos a bai bon. Awor ta wardando e sobránan yega pa por tèst nan tambe e siman aki i pa despues distribushon i benta por kuminsá na un manera sigur.