WILLEMSTAD.- No ta usual i tampoko ta kompetensia di un dunadó di trabou pa duna instrukshon pa un empleado bai hasi un tèst di laboratorio. Esei no ta su tarea sino di un profeshonal riba tereno di salú. Esei di akuerdo ku dr. Izzy Gerstenbluth den un reakshon e siman aki riba dunadónan di trabou ku ketu bai ta trata di obligá nan trahadónan pa hasi sierto tèstnan kontra COVID. T’asina ku tin kasonan kaminda tin trahadó ku a sali negativo den su promé tèst na laboratorio, pero tòg ta eksigí un tèst antigen pa ta sigur ku e no tin e vírus.

Segun e epidemiólogo no ta usual ku un dunadó di trabou ta hasi algu semehante, ademas e no por obligá e persona di hasi esei si e ta den servisio kaba. Ademas algu manera esei no tin sentido pasobra un persona manera esei lo por risibí un karta di su dòkter di kas òf di GGD informando ku e ta for di karentena i ku e no ta infeksioso. Pero ora tin un situashon manera esun aktual unda tin míles di hende ku tin di tene kuenta kuné, e enfoke a kambia un tiki.

Ne momentunan aki e focus prinsipal ku tin ta pa atendé ku hendenan ku ta malu. Si tin hendenan ku ke hasi tèst, ketu bai tin posibilidat pa hasi un PCR-test. Pero despues di resultado dje tèst aki ainda por tin informashon genétiko di e vírus den bo kurpa, aunke e no ta un peliger mas.

Segun Gerstenbluth, e por sigurá ku despues di 12 dia ku bo a tèst, e vírus lo no ta aktivo mas den bo kurpa, a ménos ku bo ta un persona ku ta sufri di un malesa ku ta afektá bo sistema di imunidat. Den e kasonan ei e vírus lo por keda un periodo muchu mas largu.

Pues e mihó manera pa wak si bo ta infeksioso ainda ta dor di hasi un tèst antigen. Pero si bo no tin síntoma i tin dies dia kaba den isolashon, mayoria hende lo no ta infeksioso mas. I no ta hustu pa eksigí pa hasi un tèst tòg di un trahadó kontra su deseo.

Pero tòg ta bon pa informá ku na momentu ku un persona a pasa den e proseso i finalmente a sali for di isolashon, ta nifiká ku e no ta infeksioso mas. E por sali pero no ta nifiká ku su kurpa ta bon kaba. E vírus di COVID por laga un persona ku sierto síntomanan pa un tempu relativamente largu. Tin hende ku ta keda un tempu sin nan olfato ni smak, tin otronan ku ta keda sinti kansansio sin ku nan tabata físikamente muchu aktivo.

Tin otronan ku por keda ku problema pa hala rosea manera nan tabata hasié normal. Pues e grupo di hendenan ei kisas lo tin di bai revalidashon despues ku nan tabata malu.