WILLEMSTAD.- Nos tur ta konsiente ku pa motibu di desaroyonan rondó di COVID-19 ta difísil pa hopi hende kumpli ku tur nan debernan finansiero. Lamentablemente, no ta tur hende ta tene nan mes na reglanan den tráfiko i ta haña un but.

Pa suavisá e pagonan un tiki, e biaha aki Ministerio Públiko a bini ku ‘Covid speshal’.

Esaki ta nifiká ku tur hende ku but habrí por drenta un areglo di pago ku mínimo NAF 19,- i por paga e resto den 24 luna. Por paga ku maestro òf via Pagafasil. No ta tuma sèn kèsh.

Ministerio Públiko ta hasi un yamada urgente na tur persona ku ainda tin but habrí, pa bin paga esaki mas pronto posibel òf pa drenta den areglo di pago. Di e forma aki ta evitá ku e persona ta keda detené i ku e mester sinta un kastigu di prizòn supsidiario imponé pa hues.

Ofisina di Paga bo But ta situá na Waaigat, pariba di ofisina di Curoil riba Abraham Chumaceiro Bulevar.

Orarionan di ofisina pa asina tur persona por pasa paga nan butnan ta di djaluna pa djabièrnè di mitar di 8 di mainta pa mitar di 12 di mèrdia i di mitar di 2 di mèrdia pa mitar di 5 di atardi. Riba djabièrnè ofisina ta sera 4 or di atardi.