WILLEMSTAD.- Kòrsou a konosé un record nobo pa loke ta trata kantidat di kasonan positivo di Covid-19. E informe ofisial di gobièrnu di Kòrsou ta indiká ku pa e fecha di awe tin 79 kaso positivo nobo ku ta hiba e total di kasonan positivo te awor na 1561. Un total di 15 persona a rekuperá, miéntras ku tin 8 persona ku a keda hospitalisá. E kantidat di kasonan aktivo a yega 590.  E parti mas lamentabel ta ku a registrá un morto mas relashoná ku Covid-19, asina dr. Izzy Gerstenbluth a duna di konosé.

Ronny Cornelis di MEO di su banda a splika ku no ta sin mas ta sera negoshinan. Nan tambe ta konsiente ku situashon ta difísil i den e kuadro ei hinter e tim lo sigui papia ku hendenan i trata na motivá i konsientisá tur hende ku mester kumpli ku e reglanan di distansia sosial i otro reglanan higiéniko. Sinembargo no por keda papia, a yega e kaminda ku mester aktua severo. Pa loke ta trata fiestanan klandestino Cornelis a duna di konosé ku nan no sa unda tur e fiestanan ei ta tuma lugá i p’esei ta pidi komunidat pa yuda i informá outoridatnan via 917 i otro numbernan. Cornelis a finalisá bisando; ‘no tin niun hustifikashon pa kosnan robes ku ta pasa.”

Bosero di kuerpo polisial Imro Zwerwer tambe a para ketu na e fiestanan klandestino. E bosero polisial a mustra ku den e tipo di fiestanan aki un grupo di hende ta eksponé nan es i tambe hinter komunidat. E komportashon aki no ta aseptabel Mas detaye den edishon di EXTRA.