WILLEMSTAD. - Manera ta konosí hafnan di Kòrsou tambe ta benefisiá durante e temporada krusero. Despues ku COVID-19 a hasi su entrada den humanidat i a sòru pa basta problema, mester indiká ku e sektor di krusero ta un di nan ku a haña sla duru.

Curaçao Ports Authority (CPA) tambe ta un di e sektornan ku ta benefisiá den e temporada krusero. Despues ku ‘Center for Disease Control’ (CDC) a saka un ‘No Sail Order’ por tuma nota ku esaki a afektá Kòrsou tambe, pa motibu ku tur krusero ku ta inskribí na Merka, pero ta nabegá kualke otro parti di mundu, mester a mara nan barkunan.

Ultimo tempunan por a tuma nota ku vários linia krusero a skohe Kòrsou pa laga nan barkunan drumi, pendiente e merkado krusero kuminsá atrobe.

Den un komentario kòrtiku ku redakshon  di EXTRA, bosero di CPA, a splika ku e momentunan aki tur e pirnan ta okupá riba un base kontinuo.

Sinembargo tin mas krusero den “pipeline” di kual lo añadí mas barku pronto den e rotashon ku ta hasi uso di nos pirnan.

Pa loke ta trata e último “update” di CDC, nan a anunsiá ku a prolongá e ‘No Sail Order’ te ku 30 di sèptèmber 2020. Esaki ta pa kruseronan ku tin kapasidat pa akomodá minimal 250 pasahero.

Aktualmente mayoria di e barkunan ku ta mará aki na Kòrsou, ta mará te 30 di sèptèmber 2020.