For di benta di stampia

WILLEMSTAD.- Resientemente, sr. Thomas Roggendorf, direktor di Cpost International N.V., tabatin e honor di bishitá Voedselbank Curaçao na

Dokweg pa entregá un donashon na balor di 17.290 florin. E donashon aki a sali for di e resultado di benta di e seri di stampia COVID-19 ku Cpost a emití na yüni último. Ku e kontribushon aki Cpost International N.V. tambe ta duna su granito pa sostené nos komunidat spesialmente den e tempu di desafio ku nos ta biba aktualmente.

Yüni último Cpost International N.V. a emití un seri di stampia spesialmente dediká na e trahadónan ku a hunga

un ròl vital den e lucha kontra di COVID-19. Ku e entrada generá for di e benta di e seri di stampia aki, Cpost International N.V.  a hasi un donashon signifikativo na Voedselbank Curaçao. Gran parti di e seri di stampia aki a wòrdu kumprá via di nos página di benta elektróniko (e-commerce), ku ta konsistí di klientenan for di Hong Kong te ku Suesia. Cpost International N.V., ta ekstendé palabranan di gratitut na un i tur ku a kumpra e seri di stampia aki i ku di e manera aki a

kontribuí na e esfuersonan pa sostené esnan ku na e momentunan aki mester di nos yudansa.

Yegando na final di e aña aki, Cpost International N.V. ta hasi apelashon riba generosidat di un i tur

ku tin e posibilidat pa sigui saka un man pa yuda nos kompatriotanan ku ta den mas nesesidat. Kada

aporte por hasi un diferensia den e situashon ku nos ta bibando aden. Huntu nos tin ku kuida i sostené otro.