WILLEMSTAD.- Cpost International, e servisio postal di Kòrsou, ta kontentu di por presentá un konmemorashon históriko. Na yanüari 2023, Prinsesa Amalia a hasi su promé bishita ofisial den Karibe komo prinsesa heredera, pa asina konosé e region. Riba 7 di desèmber, Prinsesa Amalia ta selebrá su di 20 kumpleaño. E okashon spesial aki ta motibu pa Cpost lansa e stampia di 24 karat di oro na honor di Prinsesa Amalia.

E homenahe no solamente ta selebrá e promé bishita di Prinsesa Amalia, pero tambe ta honrá su ròl komo heredera designá pa sinta riba e trono, na momentu ku su tata a bira rei dia 30 di aprel di aña 2013.

E CEO di Cpost International, Sr. Jervhes Josephia a deklará: 'Nos stampia nobo di 24 karat di oro ta marka un momentu memorabel den e historia filatéliko di Kòrsou, uniendo tradishon ku desaroyonan avansá di futuro.' Ademas, e CEO ta gradesido pa e bunita diseño trahá pa Martine den Boer di Studio Excello.

Kolekshoná e stampia spesial aki
Probechá di e oportunidat pa kolekshoná e stampia di 24 karat di oro! Tur kolekshonista di stampia por bishitá e tienda di stampia digital na www.cpostinternational.com pa kumpra e stampia úniko aki. Tambe por bishitá un di e sukursalnan di Cpost na Groot Kwartier òf Punda pa kumpra e stampia aki.