WILLEMSTAD.- Na honor di aña nobo chines i kuminsamentu di e aña di Toro, Cpost International ta lansa un seri di stampia nobo. 2021 ta aña di e toro di metal. E personanan ku ta nase den e aña di Toro di Metal ta karakterisá pa nan honestidat, diligensia. Forsa i seriedat. E determinashon, pasenshi i un fe fuerte i konfiansa den nan mes ta karakterístikanan ku ta sigurá ku e personanan aki por alkansá nan meta i hopi bia triunfá.

Selebrashon di e aña nobo chines

E aña nobo chines ta selebrá durante 15 dia i ta tradishonalmente e selebrashon mas importante di aña pa e komunidat chines. Kada aña nobo ta konsentrá den un animal diferente, tambe konosí komo e horoskop chines. En total ta 12 animal, ku ta bin dilanti kada aña. kada animal tin diferente rasgo di karakter i ta basa den e rasgonan aki ta hasi e predikshonnan riba futuro di un persona.

Diseño di e seri di stampia di aña di Toro

E seri di stampia a keda diseñá pa Marcel van Duijneveld i ta konsistí di fotonan di diferente rasa di toro inkluyendo e toro afrikano òf bufalo afrikano, e toro indio, e toro eskoses Highlander, e bufalo merikano i e toro almizclero arico. E seri di stampia aki ta disponibel.