WILLEMSTAD – Aparte di e mapa di apertura ku Curaçao Restaurant Association (CRA) a presentá tin tambe e parti di sosten finansiero i mester hasi algu urgente ku e areglo di NOW i TVL (Sosten pa Gastunan Fiho). Na e momentunan aki un restorant mester hasi tur pago inmediato; di personal, gastunan sosial, gastunan fiho i impuesto. Aktualmente e sosten finansiero di NOW ta drenta un luna despues i TVL ta drenta despues di mitar aña.
Ta kulpa BAB pa e echo ku e kontrolnan ta tuma tempu i ya kaba nan tin hopi trabou. “No por ta asina ku un komersiante ta risibí solamente un periodo kòrtiku pa pone tur nan papelnan na òrdu pero ta keda perhudiká pa instansianan ku no ta kaba nan trabou na tempu. Esaki no por sigui asina. No tin sèn mas pa paga adelanto i pa e motibu aki CRA ta proponé lo siguiente;”
Areglo di NOW bira 100%
Areglo di TVL bira 100%
Pago di NOW dentro di 5 dia despues ku a entrega petishon
Pago di TVL dentro di 7 dia despues ku a entrega petishon
Eksonerashon di pago di prima nan sosial pa por lo ménos 6 luna
Dispensashon di pago di OB pa por lo ménos 6 luna
Suspenshon di pago di ‘aanslag’ di 2020 kual kontinuamente ta keda imponé pa inspekshon i BAB
E nesesidat ta di tal grado ku CRA ta di opinion ku na e momentunan aki no ta hustu pa kere ku por paga e suma nan aki adelantá miéntras ku no tin entrada. Si e pagonan di NOW i TVL no keda hasi mas tempran e ora ei restorantnan tambe ta haña nan obligá pa paga empleadonan, prima nan sosial i impuesto mas lat tambe. Simplemente pa motibu ku no tin mas sèn. Mas aun ku bankonan no ta kla pa yuda restorantnan ku fiansa mirando e alto grado di riesgo.
Awor ta e momentu pa tuma pasonan i CRA ta kere ku esaki ta e kaminda korekto. Nan ta sali for di punto di bista ku e programa di bakunashon lo ta eksitoso i ku pa kuminsamentu di yüni, 85% di e poblashon ta bakuna. Si no logra e meta aki, CRA ta spera ku gobièrnu tin un plan kla pa e próksimo lunanan despues. “No por ta asina ku un parti di e poblashon ta perhudiká e otro parti di e forma ku hende ta pèrdè trabou i ku empresanan ta bai fayit.”
Segun CRA, gobièrnu a skohe pa e opshon pa imunidat di grupo, algu ku nan tambe ta para tras di dje i lo hasi nan máksimo esfuerso pero si mester ta asina ku si no logra esaki mester tin senario prepará. “Mester tuma medida pa esnan ku si a bakuna pa ofresé posibilidat pa asina ekonomia por bolbe bai drai. Esaki por pa medio di un pasport di bakunashon ku por ta un alternativa tòg pa akseptá kliente den restorant. Esaki tambe por ta un inisiativa pa tòg esnan ku no ke bakuna bai bakuna.“
Laga un komentario