WILLEMSTAD – Curaçao Restaurant Association (CRA) un biaha mas ta bati alarma pa sobrebibensia di nan miembronan. CRA ta sumamente sorprendí pa e echo ku tur intento ku nan a hasi pa trata na oumentá entrada pa restorant ku ainda ta solamente ‘delivery’ (entrega) ta permití i nada di ‘takeout’.   Miéntras tantu serka supermerkadonan si por tuma kuminda. Restorantnan tin tur komprenshon pa e medidanan mas fuerte pero despues ku pa lunanan largu a sufri ku sla desproporshonal pa diferente medida, un biaha mas gobièrnu a opta pa un skohensia ku ta sali malu pa e sektor aki.

E sistema di entrega na kas ta trese gastu èkstra kuné ku konsekuensia ku e márgen ku ta sobra ta mínimo i klientenan por lo general no ta dispuesto pa paga algu aserka pa e servisio di entrega. Anto e biaha aki banko, Aqualectra i doñonan di edifisio si no ta dunando un periodo di grasia.

E kompetensia pa entrega ta mortal. Trùk di pan ta ofresé kuminda mas barata, for di kas sin ningun kontrol di higiena kuminda ta wòrdu entrega i ya a menshoná e parti di supermerkadonan. Esaki no solamente ta kompetensia pero tambe inhustu segun CRA. Lokual ta sobra pa restorantnan ta insufisiente pa kubri tur gastu i pa tene e kushina habri.

CRA ta sigui boga pa por hasi ‘takeout’ pues e kliente mes ta pasa buska su kuminda. Einan e kontakto ta mínimo asta porta ménos ku entrega na kas. Si por pasa tuma kuminda riba dia di plachi, ta duna e hendenan konfiansa i doñonan di restorant ta sigurá di un entrada direkto. Otro opshon ta e sistema di ‘drive-thru’. Esaki ta e momentu adekuá pa evitá supermerkadonan yen òf esnan ku ta riba kaya pa kumpli ku labornan vital por pasa kumpra un algu lihé. Esaki ta un oportunidat pèrdí di entrada pa e sektor segun CRA. Straño ta ku esaki nan tabata e promé kosnan ku por a habri despues di lockdown aña pasa.

E sektor di restorantnan ta kere ku den konsulta ku nan adelantá por a tuma un mihó desishon pa e ekipo di krísis. E opshon di ‘take-away’ i ‘drive-thru’ por a yuda ku e okupashon haltu di supermerkadonan i sin mas peliger duna pueblo un sentimentu di un poko mas libertat. Awor ku e medidanan a keda alarga te ku 16 di aprel ta bira un luna ku solamente riba entrega restorantnan por drei.

CRA ta hasi un yamada dramátiko pa konsiderá e opshonnan aki. Na bienestar di e sektor, na bienestar di masha hopi restorant ku despues di 2020 nèt awor ku a kuminsá mira e lus pero toga ta keda konfrontá ku restrikshon innesesario.