WILLEMSTAD.- Crisis Bank, e proyekto di prevenshon di hamber i pobresa di Stichting Tegen Kindermishandeling ta bati alarma i ta sklama na Gobièrnu i na komunidat pa yudansa. E organisashon ta indiká ku for di momentu ku e krísis, kousá pa Covid-19 a kuminsá, Crisis Bank a start ku yudansa inmediato kaminda ta proveé famianan i personanan ku a kai den pobresa i ku a pèrdè trabou pa motibu di e krísis, ku kuminda.

Te na e momentunan aki Crisis Bank a parti mas ku 17.000 pakete di kuminda riba su propio forsa. Aparte di kuminda ku ta e nesesidat básiko prinsipal di e ser humano, Crisis Bank ta yuda tambe den otro forma manera koriente ku awa, kompra di remedi pa esnan di ménos rekurso i drechamentu di kas pa yuda na e sentido di balor propio spesialmente serka muchanan. Den e fakansi grandi di aña pasá Crisis Bank a pèrkurá pa no ménos ku 1000 mucha di tur edat risibí unifòrm, tas i artíkulo di skol pa aliviá e doló bou di e famianan. Tur esaki Crisis Bank a logra dor di sosten di komunidat, entre otro atraves di donashon di kuminda den Goisco, donashonnan finansiero i di material i akshonnan di donashon.

Mas aleu e organisashon ta indiká ku nan no ta risibi sèn di Ulanda i p’esei nan ta hasi apelashon na Gobièrnu di Kòrsou i tambe na sektor empresarial pa asina nan por sigui yuda esnan den nesesidat.

Mas informashon: Stichting Tegen Kindermishandeling telefòn 5221235. E-mail: [email protected] / MCB bank 330-000-000.

LAGA UN KOMENTARIO

Please enter your comment!
Please enter your name here