Bon evaluashon ta nifiká kontrakt entrante yanüari 2021

WILLEMSTAD.-E kompania Curaçao Refinery Utilities (CRU) a kuminsá proseso di evaluashon di trahadónan. Despues ku e kompania PDVSA a stòp ku su operashonnan di Refineria Isla, CRU a mantené tur trahadó den servisio pa alrededor di seis luna, pagando tur salario i otro benefisio. Ora ku e dil ku Klesch no a sigui CRU a sigui traha ku ménos trahadó. EXTRA a tuma nota ku CRU a kuminsá evaluá trahadónan i esnan ku pasa e evaluashon bon lo haña un kontrakt di trabou nobo entrante yanüari 2021.

Siguiendo e desaroyonan rondó di futuro di e refineria di Kòrsou EXTRA a tuma nota CRU di un manera hopi firme ta splika trahadónan ku prolongashon di nan kontrakt di trabou ta dependé hopi di e evaluashon. Si durante di e periodo d yanüari 2020 pa 30 di oktober 2020, e empleado tabatin mas ku un supervisor anto e supervisor aktual mester buska informashon serka e supervisornan promé. Kada supervisor mester yena un dokumentu ku informashon di kada empleado. Despues e supervisor huntu ku su gerente ta papia ku e trahadó riba e resultado di e evaluashon. Lo evaluá e kontribushon i aktitut di e empleado. Si e tin konosementu di e trabou, si e tin motivashon propio pa resolvé problema, si e ta traha bon den tim, si por dependé di dje pa ehekutá i kompletá su trabou i hopi detaye mas.

E loke ku ta hala atenshon den esaki ta ku CRU ta indiká ku e trahadónan ku ta bon lo haña un kontrakt nobo entrante promé yanüari 2021.