WILLEMSTAD.- Curaçao Refinery Utilities NV (CRU), den un huisio sumario entamá kontra di Refineria Isla Curaçao BV (Isla), a pidi pa korte dikta un desishon, pa loke ta trata e lokual ku Isla tin ku paga pa almasenahe di su produktonan den tanki. Ayera hues a duna CRU rason den su demanda riba refineria Isla, Refineria Isla tin di paga CRU 11 mion florin mas 99 mil florin pa almasenahe.
Den e akuerdo di hür entre partidonan tin pone ku e produkto ku ta den bòm di tankinan, ku tin un sierto kantidat ta keda komo propiedat di RdK.
Den un karta di 3 yanüari, RdK ta urgi Isla pa entrega un lista di produkto ku e tin den tankinan di RdK. Tambe ku RdK lo ta dispuesto pa almasená e produktonan pa isla kontra di pago via di un kontrato. Sinembargo ta te den luna di yüni, Isla ta entrega lista di produktonan ku tin den tankinan.
Dia 11 di ougùstùs di e aña aki, CRU ta manda faktura pa isla di almasenahe pa un suma di Naf.31.377.471,66. Un luna despues ta sigui beslag konservatorio di parti CRU riba Isla i tambe Isla su kuenta na Banco di Caribe.
Na momentu ku CRU a entamá e proseso aki, Isla a indiká ku korte no ta outorisá pa atendé e kaso aki, pasombra partidonan a kumbiní ku si nan tin un diferensia ku lo bai korte di arbitrahe. Pero hues ta rechasá e ponensia aki.
CRU a usa e suma di 0,40 USD pa bari pa kobra Isla. Isla no a bai enkontra di esaki. E tarifa ta loke ta apliká internashonal pa almasenahe tambe. Isla a bai di akuerdo ku e suma pa bari. Pero finalmente hues ta apliká e suma di 0,25 USD pa bari ta loke ku Isa debe CRU.
E pregunta ta surgi kuantu tanki tin ku produkto. CRU a risibí un lista desenas di tanki ku nan produkto. Pero segun CRU e lista no ta korekto pasombra vários di e tankinan ta bashí òf loke ku tin den nan ta di RdK (CRU mes abase di e kontrato ariba menshoná. Hues ta sali for di e punto di bista ku 88 tanki tin produkto di Isla manera CRU a indiká.
Isla ke a usa un disputa ku e tin ku CRU tokante di BOO i asina deskontá e debe aki. E ponensia aki di Isla a keda rechasá dor di hues.
Isla a bisa di ke bende e produktonan. Den re-konvenshon hues ta rechasá demanda di Isla pa lanta e beslag konservatorio ku Isla a pone riba e produktonan.
Finalmente hues a duna CRU rason den su kalkulashon, kaminda ku Isla tin ku paga CRU pa almasenahe, for di yanüari 2020 te ku awor, un montante ku tur luna ta krese ku miónes di florin. Hues a bai di akuerdo. Isla tin di paga 11 mion florin mas 99 mil pa dia for di 16 ougùstùs 2020 te dia e produkto ta almasena serka CRU.
Segun RdK, e veredikto ta nifiká ku Isla konsekuentemente tin un debe grandi mas di 24 mion florin serka CRU. Tanten e produktonan ta den e tankinan, e debe ta krese tur luna. Ku e huisio aki, CRU por kuminsá bende e produktonan pa por kubri parti di e debenan ku Refineria Isla tin, segun RdK. Esaki por pone pago di redundansia number 3 na eks-trahadonan di refineria Isla na peliger. Pasombra hustamente bendementu di produktonan di Refineria Isla ku tin den tanki, tabata pa kubri e di tres pago di redundansia.