WASHINGTON DC,  -  Curaçao Tourism Board (CTB) a firma un akuerdo ku Major League Baseball (MLB) na vispera di All Star Game pa dje forma aki pa medio di MLB i nos peloteronan ku ta hungando beisbòl profeshonal na Merka promové Korsou. Den un entrevista ku Hugo Clarinda  direktor interino di CTB,  el a splika ku esaki ta e loke ku CTB pa algun tempu kaba tabata trahando riba despues di a firma ku Didi Gregorius. Den kurso di ayera 17 di Yuli,  CTB i MLB a yega na un akuerdo den presensia di Minister pa Desaroyo Ekonómiko i Turismo Steven Martina pa CTB por hasi uso di forma optimal di nos hungadónan den nan unifòrm,  logo dje ekiponan pa promové Kòrsou den parkenan di beisbòl manera tabata e kaso ayera nochi den National Park na Washington durante di All Star Game.

Promoshon di Kòrsou Ayera Nochi den National Park kaminda esnan na kas rònt mundu por a mira esaki tras di Home Plate.

Minister Steven Martina ta kere ku esaki ta un bon stap pa Kòrsou por sigui promové su mes pa medio dje hungadónan di beisbòl profeshonal mirando kuantu hende ta presensia e partidonan di beisbòl aki rònt Merka i tambe sigui transmishonnan den eksterior.

Sr Martina ta kere ku mester sigui invertí den deporte mirando ku Kòrsou su nomber ta zona den diferente deporte internashonalmente, manera beisbòl, natashon, atletismo i tambe futbòl ora nos selekshon bai hunga afó representando nos bandera.

Di Parti di CTB,  sr. Clarinda ta kere ku esaki ta djis komienso di e vishon di promoshon na Merka i ta spera ku mas hungadó lo por logra subi den Liga Grandi pa asina nos por sigui haña mas reakshon manera ta e kaso aworakí ku por ehèmpel un Ozzie Albies i Kenley Jansen ta den All Star Game i Kòrsou su nomber ta keda menshoná praktikamente tur dia for di ora e dos peloteronan aki a keda selekshoná.