WILLEMSTAD - Djasabra último CTB a hasi entrega di dos Sea-Doo na Citro. Esaki a tuma lugá na Citro Boothuis Vissers Haven Caracasbaai.

CITRO, ta un organisashon di boluntario ku ya pa 49 aña ta hasi trabounan di reskate riba laman. Pa por hasi esaki, e organisashon ta hasi uso di diferente tipo di medio di transporte.

Na 2014 Citro a amplia ku 2 Sea-Doo ku ta fasilitá e trabounan di reskate i guia riba laman. Mirando e nesesidat, yudansa i aporte ku e Sea-Doo-nan aki a duna durante e delaster 10 añanan, mester a tuma e desishon pa remplasá esakinan pa otronan mas moderno i ekipá pa e trabou ku Citro ta hasi.

Mirando e importansia ku e Sea-Doo-nan aki tin pa Citro i tambe ku turismo ta un di nos pilarnan ekonómiko kresiente, Citro a aserká Ofisina di Turismo di Kòrsou (CTB) ku e petishon pa duna su aporte pa Citro por a logra yega  na 2 Sea-Doo nobo pa e organisashon.

Djasabra tabata dje leu ei ku e entrega di e Sea-Doo-nan a tuma lugá i na e okashon aki Minister Charles Cooper, temporalmente enkargá ku e kartera di Ekonomia, a duna di konosé ku e ta sumamente kontentu di mira kon turismo ta desaroyando i ta dunando e aliento nesesario ku ekonomia di Kòrsou tabatin mester. Esaki ta trese speransa, perspektiva i konfiansa, pa stimulá e klima di invershon riba Kòrsou. Danki na trabou duru di e diferente gruponan di interes den e industria akí.

Cooper a trese dilanti ku e ta  rekonosé i balorá kada aktor ku a i ta kontribuí inkansabelmente na e industria di turismo aki ku nan granito.

Esaki tabata motibu ku Cooper na un manera partikular ta duna e rekonosementu na kada persona ku boluntariamente komo miembro di Citro ta pone nan bida i ekspertisio na disposishon pa reskatá bida di otro ser humano, inkluyendo turistanan ku ta bishitá nos playanan i hasi uso di e diferente atrakshonnan turístiko marítimo.

Un palabra di elogio tambe ta bai na tur spònser i spesialmente na CTB, ku tambe ta mira, rekonosé i aportá na e trabounan balioso realisá.

Pues un danki na CTB ku a kontribuí na e kuerpo di Citro ku dos Sea-Doo pa sigui ku e trabounan riba laman.

Ku e Sea-Doo-nan aki, huntu ku e konosementu i ekspertisio lo ta di gran balor pa sigui hasi un gran trabou, pa yuda mantené e seguridat di komunidat i turistanan riba laman, tur momento ku tin mester di Citro.