WILLEMSTAD.- Ofisina di Turismo di Kòrsou, Kuerpo Polisial di Kòrsou i tambe e kompania di seguridat Securitas a uni pa supla bida bèk den e organisashon di Politur. Dje forma akí ta evitá ku malechornan ta sigui hasi daño na nos turismo. Ayera, djabièrnè dia 2 di ougùstùs, den oranan di atardi un grupo di 12 persona, pertenesiendo na e kompania di Seguridat Securitas, a huramentá serka Minister di Hustisia komo agentenan di Politur.

Despues di a sigui tur e preparashonnan korespondiente, entre otro komo Polis Ekstraordinario (Buitengewoon Agent van Politie) e agentenan di Seguridat aki konhuntamente ku agentenan di Kuerpo Polisial di Kòrsou, pertenesiendo na Politur, ta bai patruyá den áreanan turístiko i e asina yamá ‘Hotspotnan’.

Politur di e forma aki ta bai pone mas atenshon na e aspekto di prevenshon, apesar ku nunka tin 100% garantia ku nada no por pasa. Ademas e  turista ku haña su mes den kualke situashon fèrfelu por konta ku e apoyo, sosten i asistensia   nesesario.

Ku e logro importante aki, Politur konhuntamente ku sosten di Ofisina di Turismo (CTB), KPC (Kuerpo Polisial Kòrsou) i Securitas ta sigui den su proseso di kresementu ku e mira pa yega na un kantidat propio di 35 agente di Seguridat den e próksimo 2 añanan.

Riba e foto athuntu por mira e grupo kompleto i tambe por tuma nota di e momento ku Minister di Hustisia, Mr. Quincy Girigorie, a kaba di huramentá e agentenan di Seguridat di Politur.