WILLEMSTAD.- Ministerio di asuntunan ekonómiko huntu ku CTB, stichting vrienden van de dierentuin (FOCZ ), GGZ departamento di Capriles kliniek i Curaçao Zoo & Botanical Garden a start ku algun proyekto noble pa yuda mehorá nos parke di bestia i hardin botániko nashonal.

E proyekto aki ta un ‘boost’ pa yuda krea un trayekto sostenibel.

Danki na sra. Giselle Mc William ku durante añanan ta yuda Curaçao Zoo & Botanical Garden, a boga pa inkorporá nos parke di bestia nashonal den e proyekto  “Kòrsou ta dushi i limpi. Bib’é, Stim'é.”

Asina a krea algun parti ku lo yuda ku e estétika di e parke i duna peso pa un i tur mira e balor agregá di e potensial ku e parke tin di ta e atrakshon number 1 pa famia tantu lokal komo turista.

Durante e 2021 te ku komienso di 2022 CTB lo sostené Stichting vrienden van de Dierentuin ku no mas ku 120.000,- florin pa di un forma strukturá karga ku labor diario di klientenan di GGz ku lo yuda den hardineria, plantashon i preparashon di áreanan pa públiko bishitá.

Tambe CTB ta sostené e trabou di limpiesa general di e parke paden i pafó i pa yuda mantené esaki, no ta un sekreto ku e último 10 aña tabata un masakre for di gobièrnu pa ku e parke, un sin fin di mandatario sin vishon i òf ku agènda skondí a purba na diferente manera pa sera e parke aki.

Pero ku lucha i determinashon e tim di maneho a sigui bringa i poko poko ta mira adelanto, e famoso red tape a wòrdu kitá dor di minister Jesus-Leito i su kolaborador ku a logra despues di mas ku 7 aña pa entregá e ‘beheersovereenkomst’ na e maneho di e parke i tambe e pèrmit pa por kobra un entrada i asina sostené lo mas ku por mirando e rekorte nan inhumano ku a tuma lugá di sigur aña 2017 te ku awor.

Ku e proyekto aki “Kòrsou ta dushi i limpi. Bib’é, Stim'é.”  lo bai krea un vertikal garden resiklá, lo usa mas ku 1000 tayer di outo ku lo wòrdu dekorá i kologá na e kurá di nos parke di bestia parti pafó i den e tayernan lo planta mata, asina krea un asina yamá muraya bibu ku lo tin diferente mata ku uso medisinal, ornamental i pa konsumo.

Tambe durante 2021 lo karga proyekto Tamarein, den nos parke di bestia tin mas ku 60 palu di tamarein ku dor di falta di rekurso I forsa humano no por a kosecha e frutanan aki ku regularidat, danki na CTB lo por hasi esaki i bende e produkto aki riba merkado lokal i di e forma aki krea fondo pa sigui ku e proyekto noble di forma klientenan di GGz Klínika Capriles pa mañan ku Dios ke nan mes por ta empresarionan mikro òf por drenta sektor laboral den agrikultura.

Curaçao Zoo & Botanical Garden ta yama un i tur ku a duna nan aporte pa e proyekto aki a mira lus di dia I ta invitá un i tur ku ke duna un man pa tuma kontakto ku nos na info@curacaozoo.com