WILLEMSTAD.-  Curaçao Airport Partners N.V. (CAP), ta kontentu pa kompartí ku e perspektiva di tráfiko di pasahero pa wenter 2023/2024 ta positivo. CAP a enfatisá riba mantenshon di su ret di ruta, kresementu di tráfiko di pasahero i diversifikashon di kapasidat di asiento, primeramente for di Merka i Sur Amérika. Amsterdam ta konta pa 38% di kapasidat di asiento; Nort Amérika 17%; Sur Amérika 32% i Karibe Hulandes 13%. Kresementu total di kapasidat di asiento ta +21% kompará ku 2022.

Kompará ku e kapasidat di asiento pa region pa wenter 2023/24 ku esun anterior, Oropa lo krese ku +45%; Sur Amérika ku +32%, Merka 21% i Canada ku +39%. For di Amsterdam, Corendon lo lansa vuelo nònstòp nobo ku un avion A350, TUI lo krese pa servisio dirèkt i nònstòp dos biaha pa dia i KLM lo krese for di buelo diario pa diesun (11) biaha pa siman durante periodo pik di wenter.

For di Merka, American Airlines ta oumentá servisio nònstòp semanal pa Charlotte tur dia, JetBlue lo krese for di sinku (5x) biaha pa siman pa servisio diario for di New York, JFK i Delta Air Lines lo lansa servisio nònstòp semanal riba djasabra for di Atlanta, Georgia. Westjet lo krese ku servisio dos biaha (2x) pa siman for di Toronto, Canada riba Djamars. Azul Airlines lo krese ku servisio nònstòp dos biaha pa siman for di Belo Horizonte, Brazil i Avianca lo oumentá servisio nònstòp pa diesun (11x) biaha pa siman for di Bogotá, Colombia.

E netwerk di ruta di Aeropuerto Internashonal di Kòrsou ta inkluí diesnuebe (19) partner di aerolínea, bintitres (23) porta di salida. Konsientisashon di marka i kamber di hotèl adishonal ta importante pa kontribuí na e kresementu di e demanda i tráfiko di pasahero. E fórmula di éksito ta den e relashon fuerte entre sektor públiko i privá pa ku e kompromiso di desaroyo di turismo.