WILLEMSTAD.- Fundashon Desaroyo Deportivo Kòrsou (FDDK) a gana e kaso ku nan a entamá kontra di Curaçao Color Events. Na novèmber 2016 e organisashon a organisá e Summer Fall Concert den Sentro Deportivo Kòrsou (SDK). Despues di e evento a resultá ku e yerba artifisial ku tabatin instalá den SDK a sufri hopi daño. A sigui hopi diskushon na momentu ku FDDDK a eksigí di Color Events pa nan kubri e gastunan. Esaki a kaba den korte i awor korte a indiká ku Curaçao Color events mester paga FDDK e gastu di alrededor di 500 mil florin i tambe otro gastunan.

Direktor di FDDK sr. Thakaidzwa Doran den deklarashon na EXTRA a splika ku bèrdat wes a duna FDDK rason ku Curaçao Color Events ta responsabel pa e daño ku a okashon na e yerba artifisial di SDK durante di e konsierto menshoná. E siguiente pasonan ta bira pa atendé ku e abogado di e organisashon pa wak ki dia ta bai paga. E desishon di korte ta drenta na vigor mesora, loke ta nifiká ku Color Events mester kumpli ku pago mesora.

Pa loke ta trata e daño okashon na SDK sr. Doran a indiká ku ta Fl 750.000,- e organisashon mester paga, pero nan no a bai di akuerdo kuné. Ta bin aserka gastunan ku FDDK a pèrdè di gana debí ku e tereno no tabata den bon estado mas despues di Summer Fall Concert. EXTRA a buska kontakto ku Verney Jansen di Curaçao Color Events pero nos esfuersonan no a duna fruta.