WILLEMSTAD.- Un informashon ku ‘DEN E BEMBE’ a risibí ayera a pone ku nos a drenta den kontakto ku presidente di Curaçao Lions Club, Sra. Mariela Romero pa konfirmá e informashon.
Den un kombersashon ku Mariela el a konfirmá nos informashon ku Lions Club a kanselá nan fiesta di Karnaval 2019. ‘ E merkado di fiesta ta fèrfelu i apesar ku tur aña ku nos fiesta di Karnaval nos  a gana sèn pa nos proyektonan, e entradanan tur aña ta ménos. Nos ta un klup di servisio i nos ta rekoudá fondo pa komunidat dor di hasi fundraising. P’esei nos tambe ta buska i studia posibilidatnan nobo di fundraising. Mester sigui inová manera semper a ferwagt di Lions Club’, asina Mariela a deklará na ‘DEN E BEMBE’.
Pa e amantenan di fiesta di Karnaval di Lions esaki sigur ta algu di lamentá.
Pa organisá un fiesta dje magnitut di esun di Lions mester di tempu tambe pa organisá i bende karchi.
Mester komprondé pa e organisashon tambe ku nan lo ke sondia oportunidatnan nobo, pasó no ta nada nobo ku kos ta malu i sigur nan lo no por bai tuma rísiko i e evento bai malu.
‘DEN E BEMBE’ ta optimista ku Curaçao Lions Club lo yega na un konsepto pa organisá un tremendo evento kaminda pueblo di Kòrsou lo duna nan sosten pa nan proyektonan.