Curaçao Ponton Festival ta informá riba regreso di sèn

WILLEMSTAD.- Sumusica BV algun ratu pasa a manda un komunikado informando tokante regreso di sèn di karchi pa medio di un komunikado:
Manera nos a palabra i komuniká siman pasa durante e reda di prensa pa ku e kanselashon di CPF 2018, nos kier informá boso lo siguiente.

Na promé lugá nos intenshon primario ta ba debolbé tur esnan ku a kumpra nan karchi di entrada pa ku Curaçao Ponton Festival nan sèn mas pronto ku ta posibel bek. Den mesun rosea nos ta konsiente ku yega na un solushon riba un término kòrtiku ta hopi difísil I no realístiko mirando e embergadura di e daño finansiero ku e evento aki a sufri.

Pero manera nos a antisipá nos lo a kuminsá hasi e trámite nan nesesario pa e siman aki nos duna mas detaye pa ku debolbé e sèn nan di karchi nan ku a wòrdu kumpra pa ku CPF.

Promé fase di debolbé
Nos por komuniká na boso ku tur kumpradó nan di karchi ku a hasi uso di nan karchi di Funmiles ya kaba por a kobra nan karchi nan via di Funmiles. Pues e promé fase di debolbé e sèn di karchi nan di entrada ta yegando su final i nos ta agradesido pa ku esaki.

Na e momento nan aki nos ta trahando duru pa yega na solushon nan mas lihé posibel pa asina por kumpli ku e kumpradó nan di karchi pero tambe ku tur e otro debedor nan ku no a logra kobra ainda pa nan servisio nan brinda òf servisio nan ku nan mester a brinda na CPF 2018.

Nos lo bai komuniká mas pronto posibel e siguiente fase ku boso, pa asina esnan konserní por tuma nota di esaki I alabes aktua sigun e instrukshon nan ku nos lo komuniká na boso. No ta keda nos otro opshon di debolbé den diferente fase mirando ku e parti finansiero di CPF 2018 te ainda ta hopi debil.

Nos ta gradesí esnan konserní pa boso pasenshi i tambe un biaha mas despensa pa e situashon fèrfelu ku a surgi. Yega na un solushon ta nos meta prinsipal i nos ta spera ku otro nan lo no stroba nos mas pa por hasi esaki. Forma I mantené un show rondó di e tragedia aki lo no yuda pero lo hasi e situashon aun mas debil.

Danki di antemano pa e atenshon presta i nos ta pidi boso pa publiká e komunikado aki mas pronto ku ta posibel.

SHARE

LEAVE A REPLY