Veredikto di Korte

WILLEMSTAD. - Curoil no ta responsabel pa e eksploshon ku a tuma lugá dia 12 di yanüari 2017 na e pòmp di gasolin na St. Helena, kaminda ku un empleada a pèrdè su bida konsekuensia di e eksploshon. Esaki korte a duna di konosé den un veredikto resientemente. E kompania ku manehá e pòmp di gasolin ta di opinion ku ta Curoil a faya den responsabilidat pa tin un bon instalashon, pero despues ku partidonan a trese nan puntonan di bista dilanti, Korte a konkluí ku Curoil no ta responsabel pa e loke ku a pasa.

St. Helena Service Center BV (HSC) i St. Helena Pompstation N.V. (pòmpstashon), a entamá un kaso hudisial kontra di Curoil demandando nan pa nan para responsabel pa tur gastu ku e pòmpstashon a haña na daño, konsekuensia di e eksploshon di dia 12 di yanüari 2017 i a pidi korte tambe pa ordená un prosedura pa konkluí kiko ta  e gastunan total di daño konsekuensia di e eksploshon p’asina ordená Curoil paga tur e gastunan di prosedura hudisial.

Curoil a oponé kontra di tur e puntonan ku e pòmpstashon a trese dilanti.

Manera ta konosí dia 12 di yanüari Kòrsou a keda sagudí ora ku a bira konosí ku durante ku un trùk di Curoil tabata yenando e tankinan di e pòmpstashon ku gasolin i ku un dado momentu a surgi un eksploshon. E eksploshon a surgi den e ofisina kaminda ku un empleada tabata traha komo kahera. E empleada aki mester a keda transportá ku urgensia pa Colombia, pa tratamentu avansá spesialisá den kemadura. Un par di dia despues e tristu notisia ta drenta ku e empleada a fayesé konsekuensia di e heridanan ku el a sufri durante e eksploshon.

Departamento Inspekshon Seguridat Laboral di trabou a realisá un investigashon, pa saka afó kon bin algu asina por a pasa. For di e investigashon a resultá ku e tapa di e sistema di ventilashon di e pos den serkania di e ofisina no tabata ariba, pues e tapa no tabat’ei. Esaki a pone ku durante ku ta yena gasolin den e tankinan bou di tera, e dam di gasolin tabata sali i pasa dor di e pipa di kabelnan di data ku ta bai e kaha ku ta registrá e kantidat di gasolin. Un chispa di un di e kantidat di aparatonan elektróniko ku den e ofisina a sòru pa un eksploshon.

Konforme e alegashon di esnan ku ta manehá e  pòmp di gasolin, t’asina ku masha tempu kaba e trahadónan ta bisa ku nan ta sinti holó fuerte di gasolin ta dominá, ora ku e trùk di Curoil ta yena gasolin. Pero aparentemente niun hende no tabata hasi kaso o sea e informashon no a yega serka esnan konserní.

Hues den su veredikto ta splika ku, den henter e proseso, e no a topa un karta kaminda ku e pòmpstashon ta notifiká Curoil di holó fuerte momentu ku ta yena e tankinan. Pues korte ta sali for di e punto di bista ku Curoil no tabata na altura di e desperfekto aki.

Banda di esaki a bin vários otro aspekto ku Curoil a trese dilanti kaminda ku nan ta di opinion ku nan no ta responsabel pa e loke ku a pasa.

E faktor di mas funesto pa e doño di e pòmpstashon tabata ku dia 8 di yanüari 2016, esta netamente un aña promé ku e aksidente e doño di e pòmp a kumpra a kumpra e instalashonnan serka Curoil pa 13.330 florin.

Den e akuerdo di benta tabata pone ku e benta  a tuma lugá “as is” i a pone tambe den e kontrato di benta enfátikamente ku eventual defektonan, bisto o no bisto òf skondí ta pa kuenta di e kumpradó, esta e doño nobo. Ku esaki Curoil for di e momentu ei no ta responsabel mas pa e instalashonnan ku tin na e pòmpstashon na St. Helena.

Ta na e doño nobo su prerogativa pa e kontrolá su instalashon riba un base kontinuo i si tin detaye pa drecha, e tin di pèrkurá pa esaki sosodé.

Den e kaso spesífiko aki, tabatin menshon di holó di dam di gasolin fuerte ta penetrá den e ofisina, pero nunka e informashon aki no a yega na Curoil.

Konsekuentemente e doño di pòmp di gasolin na St. Helena a pèrdè e kaso i mester kubri tambe tur e gastunan di e proseso hudisial.