WILLEMSTAD - Despues ku djamars último un deskonosí a blòkia i subi riba trapi di un trùk di Curoil kargá ku kombustibel, a inisiá un investigashon mas profundo. Curoil den ann prome komunikado tabata papia di un intento di atrako. Mirando e peliger ku e akto deskabeyá aki ta representá riba kareteranan di Kòrsou, inmediatamente a informá outoridat. E resultado preliminar di e investigashon ta indiká awor ku no a trata aki di un intento di atrako, pero di un asuntu personal entre e deskonosí i e empleado di Curoil.

Curoil un bes mas ta rekordá ku produktonan petrolero ta sumamente flamabel i ta rekerí pa atendé ku esakinan ku koutela i segun protokòlnan estrikto di seguridat. Na ningun momento i bou di ningun sirkunstansia ta permití pa subi riba trùknan di Curoil òf Curgas sin e pèrmitnan i e konosementu nesesario pa atendé ku produktonan flamabel.