WILLEMSTAD.- CX Pay, un kompania FinTech basá na Kòrsou i fundá na 2014, a marká djasabra pasá dies aña desde ku a prosesá su promé transakshon di pago. E echo akí ta reflehá e desaroyo di e kompania pa bira un proveedó di infrastruktura di pago den vários merkado.

Desde e promé transakshon ei, CX Pay a prosesá 8,3 mion transakshon, i a fasilitá mas ku 625 mion USD den volúmen di pago a traves di su 30 merkadonan aktivo.

Na lugá di midi kresementu riba kantidat di kuenta di ‘merchant’, CX Pay ta enfoká riba ‘merchant’ aktivo i volúmen di transakshon, ku ta reflehá e realidat operashonal di prosesamentu di pago, i entorno dirigí pa ‘compliance’.

Durante di e último dies añanan, e kompania a amplia su kapasidatnan, segun kaminda pago ta tuma lugá den práktika. Loke a kuminsá ku konekshon di ‘payment gateway online’ entre bankonan, ‘acquirer, processor’ i wèpsait di ‘merchant’, a krese pa inkluí métodonan di pago lokal manera iDeal, Sofort, Bancontact, SEPA, BitPay, PIX, AliPay i mas, tambe tokenisashon di ‘network’ di karchinan, Apple Pay i Google Pay, i diferente solushonnan di pago ku karchi den man (òf telefòn).

E plataforma ta sostené ‘tap-to-pay’, terminalnan di punto di benta ku atendé, kiosko di autoservisio i kompletamente ‘cashless’. E ta diseñá pa funshoná tantu den situashonnan ‘online’ komo ‘offline’, inkluyendo eventonan ku solushon ‘cashless’, ‘ticketing’, un ‘eWallet’ i rekoudashon di fondo basá riba donashon.

CX Pay tambe ta kompatibel ku mas ku 70 ‘Property Management Systems’ (PMS) den e sektornan di hospedahe.

Ku CX Pay ta drenta su di dos dékada, e kompania a indiká ku lo e sigui evolushoná segun volúmen di transakshon i komportamentu real di pago den Karibe i Amérika Latino.