Silvia Prince
Botanicals Scents òf Nature Curaçao NV
Dal bo bon baño promé ku tiru
Ku awanan spesial trahá, dal bo bon baño promé ku tiru. Ku e mesun awa trahá aki bo ta limpia bo kas tambe. Sra Silvia Prince di Botanical Scents òf Nature Curaçao NV mes ta traha su awanan pa baña i pa limpia kas. I e ta konta Djasabra kon esaki ta sosodé;
“2018 a kuminsá manera bon pero tabatin hopi ‘struggle’ pa nos tur. E tabatin hopi kos ku hopi hende a pasa den. Pa mi mes tambe ku malesa. Tabata un ‘struggle’ pa nos tur. Pa su empresa el a bai poko tranká pero danki dios nan a tene kabes riba awa i pa mas positivo pa den 2019 bai mihó”.
Konsentrá riba nos kurpa
E aña ku ta bini aki nos mester konsentrá hopi riba nos kurpa pa nos ta fuerte den nos salú, den nos amor i den nos sabiduria pa asina bo tin tur e kosnan ei den balansa, bo aña lo sigui mihó, Ora bo tin kualke kos pa hasi i no ta bai bon bo ta bira hasi otro pa keda den balansa. I esei nos tur mester bai traha ariba.
Nos por traha riba dje ku for di awor; kuminsá pensa riba tur e pidanan ei, bo salú, bo mente i amor pa hende rònt di bo, hasi bon. I e ora ei bo ta kuminsá tuma bo bañonan, usa e esensianan i sensia bo lugá. I bo ta keda den balansa i pensa positivo. I kòrda tin piedranan tambe di naturalesa ku por tene bu den balansa.
Bañamentu ku awa trahá
Pa bañamentu Botanicals Scents òf Nature ta traha nan awanan, awa di despoho ku zeta di esensials. Sra. Silvia mes ta traha esakinan. I e zetanan aki por usa pa baña i laba kas. Zetanan manera rosa, Ilang Ilang pa amor i protekshon. Tambe por bai riba bergamot pa e parti finansiero meskos ku vertiver. Mandarina ta mas pa pensamentu positivo. Tur loke bo ta pensa positivo ta esei ta pasa ku bo. Esnan mas usá ta mandarina, Ilang Ilang, vertiver, bergamot i tambe no lubidá e klabu esta Cloves ku ta pa e parti finansiero.
Orange, cloves i mandarina por meskla huntu. Ilang Ilang i vertiver i bergamot tambe por meskla huntu. I por traha kombinashon di nan seis i pone lavender aserka i asina tin 7 pida esensia ku ta e shete di suerte. I Nan ta traha e bañonan manera e hende pidi.
Despogo
Sra. Silvia a splika ku e despogo ta ora kaba di baña i tur kos ta pone algu den un hèmber chikí i awa lou i basha riba bo kurpa. Kòrda reflekshoná i lag’é seka na bo kurpa. No usa sèrbètè pero lag’é mes seka. Ta un holó masha dushi ta keda. E bòternan di baña por keda partí den 3. Tin hende ta kuminsá baña for di bispu di aña nobo. Sòru di baña mainta, mèrdia i anochi sigur promé ku sali kas i promé ku aña bòltu. Pa asina kuminsá aña bon.
Tin sensia ku ta usa promé di yanüari pero tin hende ta usa bañonan pa promé di yanüari tambe. E tipo di bañonan ei ta otro. Por usa entre otro baño di rosa.
Sensia
Pa loke ta sensiamentu di kas por kuminsá for di den dianan di Pasku. Sensia bo kas di patras bai dilanti ku sage pero tambe por usa benzo. Tur ta di patras di kas bai dilanti i kana semper estilo di kontra di oloshi. Kòrda sera tur bentana i laga e huma keda den e espasio di kas paden pa 15 te 20 minüt i despues ta habri e kas. I loke a kaba di kima kompleto ta tir’é pabou di kas pa e bai. Despues di esei limpia kas di dilanti bai patras ku awa di rosa, lavender, mandarina, éksito i prosperidat, pachuli ku nan mes ta traha fresku ku su rais. Den esei no tin niun kímiko. Pachuli ta pa protekshon i suerte. Ta algu konosí di hopi tempu atras i kuné ta limpia di dilanti bai patras. Eseinan ta pa suerte, abundansia i salú.
Masha importante segun Silvia ta ku promé sensia kas, mester sòru limpia kas tambe di patras bai dilanti. Bari i pasa mòp. E mòp di patras bai dilanti ta ku amoniak i benta e awa dilanti kas. I preferibel usa otro mòp pa limpia kas di dilanti bai patras ku e awa dushi. I no lubidá ku ora kaba ku tur e kosnan ei mester sende bela.
Lusa bo kas
Hasi lus na bo kas. Nos mester di lus semper pa
lusi bo aña, pa lusi bo mente. Lus semper ta bon i p’esei ta bon pa pone orange, cinamon, mandarina, bela tambe di klabu kombinashon ku otro fragansia. Lavender ku rosberi. Tur ta belanan ku ta trese holó dushi i ta iluminá bo mas.
Tambe tin e otro ritual di shete bela di shete diferente koló. I tin e otro di 12 bela ku ta sende ku ta nifikashon pa kada luna i den esei e hende ta hasi su deseo.
Sensia di palito
Tin hende no por ku karbon i ta usa e sensia di palitu. Esei semper ta usa 1, 3 òf 7 semper na oneven getal. E sensianan palitu grandi ta bon pasobra nan durashon ta 4 ora. Sensia riba karbon ta mas limitá ku e palunan di sensia. Mayoria ku tin na karbon tin na palitu i muchu mas ku esei.
Sensia promé ku aña bòltu
Pa esun ku ta sali kas for di anochi promé ku aña bòltu, ta bon pa e limpia su kas i sensia kas promé ku e sali su kas. Por hasi tur e ritualnan di sensiamentu i pone e sensia mei mei di kas. Tin hende ta bula e sensia i hasi nan deseo. E ta keda na kada hende kon nan a wòrdu eduká pa hasié. Si hende ta na duda semper e por puntra na Botanical Scents òf Nature na Las Vegas Shopping Center na Gosieweg.
Dia 30 ta habri di 8 or di mainta pa 6 or di atardi i dia 31 ta habri di 8 or pa 5 or di atardi. Semper despues di 5 nan lo por yuda e kliente, pero mihó no laga te na último ora pa kumpra kos. Kosnan ta kambia masha lihé. Awa ta kaba masha lihé ounke e kliente semper por hasi pedido pa su awanan “delux bad”. Den e tipo di bañonan ei tin loke e kliente pidi.
Deseo
“Deseo pa 2019 ta pa kuminsá e aña ku mente positivo, mente ku ta pensa den kosnan positivo so. Kuida e sali, kome saludabel, e ta poko difísil i stima bo próhimo mas tantu posibel ounke kuantu sla bin. I tambe bo mente semper positivo pasobra kosnan positivo ta bin. I loke ta stroba bu den kaminda kita nan for di kaminda pa bo haña espasio pa sigui padilanti. Kaminda tin kosnan negativo mihó pone nan un banda”, tabata deseo di sra. Silvia Prince.
