WILLEMSTAD.- Pa honra Dia Internashonal di Idioma Materno Museo di tambú Shon Cola i Fundashon Stripan a organisá un lektura presentá pa dr. René Rosalia. Den un patio yen yen di amante di literatura na Papiamentu a presensiá un charla detayá i impreshonante titulá “Dalia, transformashon di hòmber pa muhé”.

E outor  a duna resultado di un investigashon ku el a hasi analisando teksto di bandera òf banderita, kantika di tambú i kantika di tumba di e époka 1860 pa 1950. Den su ensayo Rosalia a konstatá ku e hende muhé di e temporada menshoná tabata yama su amante “dalia”. Komo dalia ta un flor mester konkluí ku pa e hende muhé di e tempu su amante tabata su flor. Esaki ta kontrali na e di dos parti di siglo 20 bin ariba kaminda dalia a kambia bira hende muhé. Komo dalia ta un flor e pensamentu a ankra ku dalia semper a para pa e ser femenino, Dalia kantá den kantika den tempu moderno a bira e hende muhé komo amante di un hende hòmber.

Pues pa e hende hòmber e hende muhé ta su flor. Rosalia a splika den e ensayo ku e motibu prinsipal ku dalia a kambia di hende hòmber pa hende muhé ta pa motibu di e represhon pisá di outoridatnan kolonial manera Koloniale Raad, Gezaghebber, Districtmeester, polis i Iglesia katóliko representá pa obispu i pastornan den parokia.

Nan ofensiva kontra tambú a logra saka kantadónan femenino for di tambú. Kantadónan maskulino ku si a sigui kanta tambú ku tumba a mantené dalia pero awor komo amante femenino. Ta pa e motibu ei e hende di awe a lanta konosé dalia komo hende muhé. E charla tabata hopi alegre i animá ku kanto i balia riba músika di tempu bieu i di tempu moderno.  Komo broche di oro e outor a presentá e buki “Dalia, transformashon di hòmber pa muhé”. El a dediká e buki na su tres rumannan Mem, Greta i Aitel Rosalia. E buki ta na benta. Pa bestèl por manda un èp via e numbernan 6905721 òf 6963204 òf 5123204. Pabien na e outor i na Fundashon Stripan i Museo di Tambú Shon Cola.

Riba e kombinashon di foto momento di presentashon di e buki Dalia.