WILLEMSTAD.- Fiskal a bai di akuerdo ku abogado Prevo pa buska e  “ voice note” ku a bira viral den kaso asesinato, ku a tuma lugá dia 16 di sèptèmber 2020 na Brievengat kaya Augusto Boelijn.

Den e “voice” por a skucha zonido di bala miéntras un señora ku aksènt spañó ta bisa esun ku e tabata papiando kuné, pa tende kon bala tabata kai.

Pa e kaso aki ku a haña e nòmber “ Sentebibu” e akusadonan Gayler Thomasita (21) i Ichel Deonisio (24)  ayera tabata den sala di korte. Ámbos ta keda akusá pa asesinato di Ruchairo Richenielo Emerencia, nasé na Kòrsou, 20 sèptèmber 2000, ku a keda likidá  dia 16 di sèptèmber 2020.

Deonisio a bisa ayera ku el a tira despues ku e víktima i  algun hòmber a kuminsá basha bala riba nan. Segun Deonisio el a tira bèk, pa defendé e ku Thomasita.

Deonisio ta keda akusá tambe pa intento di asesinato riba e  víktima femenino di fam Rast.

Tambe e ta keda akusá pa poseshon di arma.

Thomasita ta keda akusá pa kómplise di e asesinato despues di a fasilitá Deonisio outo i bis’e unda e víktima ta.

Fiskal Niks a bisa di kier skucha 3 testigu pa ku  Thomasita. Ta trata di su mama, tata i su frei.

Segun fiskal e testigunan aki a wòrdu skuchá kaba na polis. Pero despues di a skucha algun kòmbersashonnan di tap, fiskal kier konfrontá e famia ku nan.

E mayornan a bisa ku nan no ke bin polis mas i no ke nada di aber ku e kaso.

Segun fiskal tòg e ke skucha nan, pero si nan no ke deklará nada mas, e ta distansiá for di nan.

Pa loke ta trata e “voice note”, Deonisio a bisa ku ta su amigu Dèn Dèn a mand’e pe.

Hues a puntr’e unda e amigu ei ta biba, pero el a bisa ku e no sa presis. Su wela si sa. Hues na su turno a bisa di ke skucha e wela di Deonisio, paso e ke sa ken ta Dèn Dèn i tambe pa asina haña sa ken ta esun ku tabata papia na telefòn ora ku e tirunan tabata zona, pa e tambe wòrdu skuchá.

Aparentemente ta un señora dominikana ku ta biba den bisindario.

Segun testigunan, Deonisio tabata e shofùr i ta esun ku a tira, miéntras Thomasita tabata sintá den banda.

Abogado Vaders ku tin e defensa di Thomasita a hasi petishon pa suspendé detenshon di su kliente.

El a bisa ku no tin niun kaminda para den e dosié  ku su kliente tabata sa ku Deonisio ta bai tira òf tabata sa ku e akusado tabatin arma riba dje.

Tampoko e tabata sa ku Deonisio a kai será un bia kaba pa poseshon di arma.

Hues a bisa ayera ku Deonisio a deklará na polis ku ta riba indikashon di Thomasita, nan dos a kore bai e toko pa buska Emerencia.

Segun Thomasita, el a konta Deonisio ku nan a menas’é na su nòmber i a saka arma pe. Nan lo a bisé sigui kana ku e hendenan pa kos pasa e tambe.

Frei di Thomasita tambe a deklará ku nan a menas’é.

Aparentemente tur kos a kuminsá 3 siman pisá promé ku e suseso.

Tabatin un problema entre Deonisio i e víktima kaminda dalmentu di wanta lo a kai.

Riba e dia  enkuestion Thomasita a bai toko i a topa e víktima ku algun hòmber mas sintá, kual el a bisa e no sa ta ken.

Einan e víktima lo a menas’é na nòmber di Deonisio.

Thomasita  a bai i konta Deonisio i huntu nan a bai pa buska Emerencia. Segun Deonisio ora el a yega el a topa  Barton i a puntr’e kiko ta pasando. Direpente el a  mira dos hòmber para patras i nan a  kuminsá basha bala. P’esei e tambe a lòs dirèkt riba nan.

Deonisio a bisa ku Thomasita  ta gai chikí ku ta bai skol i nunka a mira e kosnan aki. Fo’i chikí e ta bin wak e i huntu nan ta basilá.

Na polis Deonisio a bisa ku 24 ora e ta armá.

Testigunan a deklará ku ta Deonisio a tira promé, miéntras otronan ta bisa ku ta e víktima a tira.

Polis a tende kòmbersashonnan di tap kaminda Thomasita a duna instrukshon na su mama pa bisa e gai mekániko, ku e tin ku bisa polis ta buraku di bala tabatin na e outo. Thomasita a ninga esaki redondamente. Djabièrnè awor hues lo tuma desishon si e ta bai di akuerdo ku abogado Vaders pa suspendé detenshon di Thomasita i dia 30 di yüni pa mitar di 10 mainta e kaso lo keda tratá integralmente.