WILLEMSTAD.-  Hues komisario ayera no a mira e motibunan pa sigui ku e dama   Z.Leito (25) mas den aresto preventivo.

Leito ayera mester a presentá dilanti hues komisario pa asina esaki tuma un desishon si e ta drenta den su periodo di 60 dia òf e ta bai kas.

Segun abogado Scheperboer –Parris su kliente niun momento so no tabatin mal intenshon.

El a splika ku Leito ta dispuesto pa paga tur hende bek.

Tambe e abogado  a duna di konos’é  ku su kliente a bin ku un plan di pago pa tur hende haña nan sèn bek di  kual esaki a keda presentá na hues komisario.

Segun e abogado e dama nunka no a bisa di no ta paga bek. E dama semper a trata tur su klientenan bon, pero e bia aki algu no a bai bon di kual el a hañ’e ku e situashon di kual esaki a eskala.

E abogado a bisa ku e ta lamentá ku a pinta Leito komo un kriminal den komunidat, pero e por komprondé ku  e hendenan ku a duna nan sèn  a rabia despues di  no a risibí nan vehíkulo.

E abogado ta di opinion ku tur kos lo bai kaba na bon mirando ku su kliente lo bai para responsabel pa tur hende poko poko por haña nan sèn.

Vários persona a keda skucha na hues komisario  den e kaso aki.

Ayera hues komisario no a haña ku tabatin sufisiente motibu pa prolongá e dama su detenshon, di kual e por a bai kas  pendiente pa su kaso keda trata den korte di promé instansia.

Leito ta keda akusá pa estafa di kompra di outo pa hende i falsifikashon di dokumento i tambe malversashon.

El a keda detené dia 5 di yüli último  na Warda di Polis Rio Canario.