WILLEMSTAD.- Un dama di edat poko avansá a haña benefisio di duda serka hues, despues ku el a splika korte dikon e no ta di akuerdo ku e but ku el a risibí.

E dama shofùr ta keda akusá di a pasa den lus kòrá na altura di Santa Rosa.

Durante tratamentu di e kaso e dama a splika korte ku esaki no ta bèrdat.

Segun e dama e verbalisantenan a par’é i bis’é ku e tin ku risibí un but pa motibu ku nan a mir’é pasa den lus kòrá.

E dama a splika ku pa e, esaki ta imposibel pa motibu ku kaminda e polisnan tabata ubiká nan no por a mir’é pasa den lus kòrá.

Segun e dama e agentenan tabata pará basta meter leu for di e lusnan ku nan ta bisa di a mir’é pasa.

Segun e señora nunka den su bida el a haña niun tipo di but pa motibu ku semper el a sòru di komportá nèchi riba karetera i respetá regla di tráfiko.

Fiskal den su rekisitorio a splika ku ta trata di dos agente ku a firma e prosèsverbal i ámbos a bisa ku nan a mira e señora pasa den lus kòrá.

Segun fiskal ta trata di agentenan ku ta spesialisá den infrakshon di tráfiko i no tin mester di duda den nan.

E dama a keda insistí ku ora el a pasa den e lus nèt esaki a kaba di bira oraño i ku hamas el a pasa den lus kòrá.

Hues a bisa ku e no ta duda den e agentenan, pero e no sa ku e agentenan tabatin un bista direkto òf indirekto manera e dama ta bisa. E agentenan no a skibi unda nan tabata stashoná ni for di kua distansia na a mira e señora pasa den lus kòrá.

Mirando esaki, hues a duna e dama benefisio di duda i a bari e but fo’i riba mesa.