WILLEMSTAD.- Korte di apelashon ayera a apsolvé  Z. Leito (30) di tur kulpa. E ta keda akusá di a estafá un total di 25 persona mas di 200 mil florin ku kompra di outo for di Hapon.

Den e veredikto Hof a splika ku no por proba ku e akusado tabata gaña e klientenan pa tuma nan sèn pa kumpra outo.

Nan mes tabata aserk’é i e tabata sera kontrakt di kompra ku nan ku e intenshon pa nan haña nan outo. Den e kaso aki no por papia di malversashon ni estafa.

Den korte di promé instansia Leito a keda kondená na 30 luna di kual 10 kondishonal i tin ku paga esnan ku a keda perhudiká e montante di 65 mil florin.

Leito a apelá su sentensia pa motibu ku e ta insistí ku e no a estafá hende.

E tabata tuma sèn for di su víktimanan pa hasi pedido pa kumpra outo na Hapon.

Segun e akusashon, Leito tabata kometé aktonan di malversashon den e periodo di 1e di novèmber 2016 te ku 5 di aprel 2017.

E tabata introdusí su mes riba página di Facebook komo un persona hopi konfiabel i asta a indiká ku kua negoshi di outo e tabata traha kuné na Hapon ku ta “ Be forward in Japan” ku ta bende vehíkulonan stür kontrali, pa asina konvensé klientenan.

E ta hasi e negoshi for di aña 2015 i nunka no tabatin problema.

Segun e akusashon, e tabata tuma montantenan entre 3 mil  pa 12 mil florin serka su víktimanan, sin nunka nan a haña òf mira e outo. Durante tur e kasonan sala tabata karga ku víktimanan.

El a bisa ku niun momento so tabata e intenshon pa perhudiká hende.

Segun Leito su negoshi tabata bai super bon te ora ku el a kuminsá yuda hende. El a splika ku hopi kliente ku tabata bestèl outo serka dje , ora ku e vehíkulo yega nan no tabatin moda di paga “invoerrechten”.

E na su turno tabata yuda e klientenan paga, pa saka e vehíkulo ku e kondishon ku e klientenan lo paga bèk.

Leito a bisa ku hopi biaha esaki no tabata e kaso i mester a paga otro outonan ku yega  ku sèn di un otro kliente. Esei tabata pone ku e mester a gaña e otro klientenan ku e outonan tabata na kaminda.

E echo aki a pone ku e negoshi a kuminsá kai den otro i el a hañ’é den e situashon ku e ta aden.

El a splika ku e kos tabata bai, ku un kliente ta paga pa otro kliente ora ku e outo yega sin ku e kliente tabata sa.

Abogado general  a haña e akusashon kompletamente probá i a hasi demanda di 48 luna pe i pe paga tur hende nan sèn bèk.

Su abogado mr Scheperboer, a bisa ku no ta trata aki di “malversashon”. Segun e abogado, Leito  tabata bende mas di 500 outo pa aña i tur kos tabata bai tremendo. Debí ku el a trata na yuda hende el a kai den buraku.

E abogado a pidi pa apsolvé akusado di tur kulpa. Hof ayera den e veredikto a duna e abogado rason.

Segun e veredikto esaki no ta nifiká ku e akusado a atendé na e mihó manera ku e klientenan.

Tampoko no por bisa ku e akusado a tuma i poderá di e plakanan di e demandantenan  di forma ilegal, pa motibu ku e sènnan aki a bai forma parti di e volúmen di benta di su negoshi. Den e kaso aki Hof a rekomendá e klientenan pa bai un kaso sivil pa daño perhuisio.