WILLEMSTAD.-Un ratu pasá a tuma lugá un aksidente ku a hala basta atenshon, na altura di e viadukto subiendo brùg pa bai direkshon di Punda. E informashon risibi na e sitio ta mustra ku un shofùr lo mester a pèrdè kontrol riba su stür na momentu ku e tabata riba e kaya na kaminda pa subi brùg.

E dama a pèrdè kontrol i bai dal den vangrail. E a keda tene su barika i ta keha doló den su barika. Ku urgensia a pidi asistensia di ambulans mirando e situashon di e dama. Ambulans a yega bastante lihé i e profeshonalnan di ambulans a atendé ku e dama pa despues transport’é pa Poli. Mientrastantu esnan responsabel a kuminsá hasi investigashon na e sitio pa determiná kiko lo por tabata e kousa di e aksidente.