Update Polisial:
WILLEMSTAD – Djasabra 11 di novèmber 2023 alrededor di 06.13’or, Sentral di Polis a risibí notifikaskon ku tin un aksidente di tráfiko ku a kaba di tuma lugá riba Kaminda Próspero “Popo” Rojer na altura di Hòfi Apostel i ku tin un persona gravemente heridá.
Mesora a dirigí un unidat di warda di polis di Barber na e sitio. Na yegada di e unidat, el a topa ku un dama shofùr ku no tabata duna señal di bida.
For di investigashon preliminar a sali na kla, ku dos vehíkulo a dal frontal kontra di otro.
Na e sitio tabatin dos persona mas heridá i mesora a pidi presensia di ambulans, ku a transportá e víktimanan den un situashon krítiko pa Sala di Emergensia di C.M.C.
Alrededor di 07.45’or, Sentral di Polis a keda notifiká pa dòkter di polis ku e dama Minerva M. Janzen nasé na Kòrsou dia 26 di desèmber 1975, a fayesé na e sitio a konsekuensia di heridanan ku el a sufri durante di e aksidente.
Personal di Departamento di Tráfiko ta investigando e kaso pa determiná eksaktamente kiko a sosodé.
E tabata yegando su kas
WILLEMSTAD.-Un mainta tempran a tuma lugá un aksidente di tráfiko riba kaminda Próspero Rojer djis despues di Barber, manera e bosero polisial sr. Maurits Rosalina a deklará na EXTRA. EXTRA tabata presente na e sitio i a tuma nota di e situashon unda tabatin algun persona seriamente herida i unu ku no tabata duna señal di bida mas. E kaso ta den investigashon.
Ta trata di un aksidente di dos outo di famia, ámbos kolo kora. E KIA Cerrato tabatin dos persona den dje, kualnan a keda transportá pa hospital i e otro outo tabatin un persona so. Informashonnan ku EXTRA a kompilá na e sitio ta indiká ku e dama ku a fayesé tabata apénas faltando un kaya pa yega su kas. Forsa na famianan i pronto rekuperashon na esnan hospitalisá.
