Update 2:

Djasabra 30 yanüari 2021 alrededor di 02.53’or, Sentral di Polis a risibí informashon di un aksidente di tráfiko ku a tuma lugá riba F.D. Rooseveltweg.

Mesora a dirigí un unidat na e sitio i na nan yegada nan a topa ku un outo ku a boltu i shofùr di e vehíkulo ku tabata parsialmente bou di esaki.

For di un investigashon ku polis a hasi na e sitio a resultá ku shofúr di e vehíkulo ku dos okupante mas tabata kore riba F.D. Rooseveltweg direkshon Palu Blanku. Diripiente shofùr di e vehíkulo a pèrdè kontrol i e outo a boltu i e shofúr a resultá parsialmente bou di e vehíkulo.

Ambulans ku a presentá na e sitio no por a hasi nada mas pa e víktima ku a fayesé na e sitio. Alrededor di 03.35’or dokter a konstatá morto di e dama Estrella Cijntje nasé na Colombia dia 19 di mei 1995.

E dos otro okupante nan a keda transportá ku ambulans pa Departamentu di Emergensia di C.M.C..

Departamentu di Tráfiko ta kontinuá ku e investigashon.

Djasabra 30 yanüari 2021 alrededor di 05.36’or, Sentral di Polis a haña notifikashon di un aksidente di tráfiko ku a tuma lugá riba Moontjeweg.

E unidat polisial ku a yega na e sitio a topa ku un dama drumi kantu di kaminda ku multiple leshon na su kurpa.

For di un investigashon ku polis a hasi na e sitio a resultá ku shofúr di un vehíkulo ku tabata kore riba Moontjeweg a alkansá e dama ku tabata kana riba kaminda.

Ambulans ku a presentá na e sitio no por a hasi nada mas pa e víktima ku a fayesé na e sitio. Alrededor di 06.50’or dokter a konstatá morto di e dama Sue-Ellen Anaica Lloyd, nasé na Kòrsou, 19 di sèptèmber 1994.

Riba òrdu di Ministerio Públiko a konfiská e kurpa sin bida pa mas investigashon.

Departamentu di Tráfiko ta kontinuá ku e investigashon.

Update:

*Despues ku den oranan di mardugá tráfiko di Kòrsou a eksihí e promé víktima, algun ora despues alrededor di 6:30 di mainta sentral di polis ta risibí notifikashon di otro aksidente riba Moontjeweg. Na yega di e patruya. A bin konstatá ku un outo mester a alkansá un peaton ku konsekuensia fatal. Esaki mesora ta bira e di dos morto den tráfiko pa aña 2021. Ta pendiente di e vershon ofisial di Kuerpo Polisial. Keda ku EXTRA pa tur informashon.

WILLEMSTAD – Awe den oranan di mardugá alrededor di 3or tabatin un aksidente ku morto riba Rooseveltweg na altura di Alves Supermarket. Un dama kolombiana a pèrdè su bida momentu ku e vehíkulo ta aksidentá i bòltu ora el a pèrdè kontrol. Segun Bosero di Kuerpo Polisial Imro Zwerwer e outo tabatin 3 okupante di kual e dama shofùr a fayesé i e otro dos víktimanan a keda transportá pa CMC pero nan situashon ta fuera di peliger. Den transkurso di dia ora mas informashon keda duna lo informá Extra su lektornan.