WILLEMSTAD.- Un ratu pasa ta registrá otro morto den tráfiko na Kòrsou.  Riba Sta Rosaweg, kasi yegando Schottegatweg, shofùr di un outo lo a pèrdè kòntròl riba su vehíkulo i a dal frontalmente kontra di un palu kantu di kaminda.

Segun EXTRA a tuma nota na e sitio, e outo a dal promé den un muraya pa despues bai dal den e palu. Den e vehíkulo tabatin tres dama i un kabayero. Un di e damanan a bira e di 7 morto den tráfiko.E otro tres okupantenan di e outo a keda transportá pa Poli pa tratamentu médiko.

Update;

Polis ta informa di identidat di e dama ku a fayese den aksidente di trafiko ayera. Ta trata di Clavienna Rebecca Isidora, nase na Kòrsou dia 31 di desèmber 1993. E dama tabata sinta patras den e outo. Dor di e impakto e outo a sak'e i swai e for di e outo. Debi na multiple leshon el a fayese.

EXTRA ta ekstende palabranan di kondolensia na famianan di e viktima.