Edishon Di Imprenta

Dama víktima den aksidente di trailer a fayesé

Komparti:

WILLEMSTAD – E dama ku a keda gravemente heridá awe mainta despues ku un trailer a los for di un pikòp i a dal den dje na kaminda di Rooi Santu, a fayesé na hospital. E dama a sufri diferente leshon grave durante e aksidente i a ser transportá di urgensia pa Curaçao Medical Center (CMC). Lamentablemente, e víktima no a sobreviví su heridanan. Ku su fayesimentu, e ta bira di 16 víktima fatal di tráfiko na Kòrsou durante 2026.

Segun informashon ku EXTRA a risibí, e trailer a los for di e pikòp durante kareda i a dal e dama, kousando heridanan grave na su kurpa. E víktima a sufri un pia kibra, leshon na su lomba i gòlpinan na su kara, ku a hasi ku e pèrdè djente.

Personal di ambulans a yega na e sitio i a duna e dama promé asistensia médiko. Despues nan a transport'é rápidamente pa CMC pa tratamentu. Sinembargo, mas despues a bin konfirmashon ku e dama a fayesé na hospital.

Polis i Departamento di Tráfiko a presentá na e sitio pa investigá e sirkunstansianan di e aksidente i determiná kon e trailer por a los for di e pikòp. Tantu e trailer komo e pikòp a keda konfiská.

Artíkulonan relashoná

Laga un komentario