WILLEMSTAD – Un dama a keda gravemente heridá despues ku un trailer a los for di un pikòp i a dal den e víktima riba kaminda di Rooi Santu. E aksidente a kousa diferente herida grave na e dama, inkluyendo un pia kibra, leshon na su lomba i gòlpinan na su kara, ku a hasi ku e pèrdè djente.
Segun informashon ku EXTRA a risibí, e trailer a los for di e pikòp durante kareda i a dal e dama na su pia. E impakto a kousa ku e muhé a sufri diferente leshon na su kurpa.
Ambulans a yega na e sitio pa asistí e víktima. Personal di ambulans a duna e dama promé asistensia médiko, despues di kua nan a transport'é rápidamente pa Curaçao Medical Center (CMC) pa tratamentu. Polis tambe a presentá na e sitio. Departamento di Tráfiko a bin pa investigá e sirkunstansianan di e aksidente i determiná kon e trailer por a los for di e pikòp.
Riba e fotonan por mira e trailer bòltu kantu di kaya, miéntras ku polis tabata hasi investigashon i determiná kiko eksaktamente a sosodé.
Na yegada di e víktima na CMC su situashon a empeorá i na dado momentu mester a bai over pa reanimashon. E situashon ta hopi kritiko.






Laga un komentario