WILLEMSTAD.- E hóben R. Bergina (22) ayera a keda apsolvé di un kaso di pornografia infantil.
Bergina a keda akusá di tabata provoká damitanan entre 12 pa 14 aña pa manda potrètnan sunú pe i tambe tabata hasi e asina yama “Cyber sex” ku nan via kámara.
Hues a posponé su kaso aña pasa pa asina hasi mas investigashon, di kual e akusado por a bai kas pendiente pa su kaso keda trata den korte.
Tur kos a sali na kla ora ku supuestamente e akusado a kuminsá menasá e damitanan riba facebook ku si nan no manda e potrètnan sunú, nan lo wak kiko ta pasa.
Esaki a pone ku un di e damita nan a spanta i a bisa su mama kiko ta pasando.
E mama mesora a bai hasi un denunsia di kual a bin arestá e akusado.
Durante di un entrada hudisial, Polisnan a konfiská su telefòn, di kual nan a bin haña basta video, imágennan, potrèt i tambe un arma di kandela den e akusado su telefòn.
Riba su “account” di facebook nan a bin mira su nòmber i tambe e menasanan.
Akusado a ninga redondamente di ta esun ku tabata menasá e muchanan.
Ministerio Públiko ta akus’é di tabatin relashon via kámara ku 3 menor.
For di promé instansia e akusado a bisa ku un di e damitanan tabata su frei i tabata menor di edat.
Segun e relato di hues, e akusado tabata manda menasa for di e profil nan yama “Real maton kriminal” i tambe “Trapa trapa boem”. Akusado a bisa ku e account nan aki no ta dje
Un di e damanan a konta ku un dia e mester a bai topa akusado na Sambil.
E akusado tabata traha einan i tabata yama su mes “Beto”.
Riba esaki e akusado a bisa ku no ta e i ku esun ku nan ta bisa ku yama Beto tin un paresido na dje.
Despues di un investigashon Polisnan enberdat a bai buska e tal Beto na Sambil i a sali na kla ku no tabata e akusado.
Un di e damitanan durante konfrontashon di foto a bisa ku ta Beto miéntras e otronan a bisa ku ta Begina.
Polis a interogá e damita, di kual el a bisa ku na momento ku e tabata kometé e aktonan seksual e ta’atin 15 aña i e akusado 18 aña.
Segun e damita despues di 10 biaha ku e akusado a pidié pa manda potrèt sunú i òf hasi e cyber sex kuné via kámara, e tabata warda mardugá ora su mayornan ta drumi i kita blo sunú hasiendo tur sorto di posishon te ora ku nan yega nan klímaks.
E akusado a bisa ku dia el a mira e damita el a mir’e pa mayor di edat.
Pa loke ta trata e akusashon di arma di kandela, e akusado a bisa ku ta trata a aki di un arma di ko’i hunga ku el a kumpra na Casa Cesar for di dia ku e tabata bai VSBO.
Fiskal a haña e akusashon legalmente i konvinsentemente pruebá i a bisa ku kasonan di pornografia infantil masha poko ta bin dilanti den korte.
Segun fiskal, e akusado a hasi su mes kulpabel na e aktonan aki dor di pidi damitanan menor pa manda potrètnan sunú pe di kual e tabata papia ku nan di porno.
Fiskal a duna di konos’é, ku e potrèt di e damita no tabata parse un hende grandi manera e akusado a bisa pero di un mucha menor.
Mirando esakinan fiskal ta demandá e akusado na 36 luna di kual 6 kondishonal.

Hues ku mester a tuma un desishon a duna di konosé ku no por a pruebá ku e menasanan tabata bin di e akusado.
E temporada ku e akusado a saka potrèt ku e arma di kandela no por ser proba, ni ku e tabata mishi ku e damitanan personal.
Loke si ta un echo, tabata ku e tabatin e potrètnan i imágennan di video di e damitanan den su telefòn pero no a plama nan riba reda sosial por ehèmpel.
Hues a splika bon kla ku posishon di imágennan òf potrèt sunú di un menor ta kastigabel pa lei.
Hues a bisa ku e dagfar pa ku e akusashon aki tabata robes. Tambe hues a bisa ku e akusado no a mishi ku e damitanan personalmente.
Mirando esaki hues ta apsolvé akusado fo’i kulpa pero ta atvertié ku si e bolbe kai den e esaki otro gai lo kanta.