WILLEMSTAD.- Ayera den sala di korte 10 akusado a presentá den sala pa tratamentu di un kaso di 20 atrako kual 10 akusado ta keda sospechá di dje.
E kaso a kuminsá mitar di 10 di mainta i a kaba te kasi mitar di 7 di atardi.
Tur 10 akusado a presentá den sala di korte.
Ta trata di D. Henriquez (21), Gianfranco Curiel (19), Kevin Calle Ibanez Flores (19), Eldjehn Cicila (22), Marlon Pieters (18), Remich Martinus (25), I. Martis (19), Jeremy Martis (20), Etienne Wout (32) nase na Boneiru, Jordy Eleonora (20).
Nan tabata drenta kas di e personanan den oranan di mardugá ora ku nan tabata drumí i sorprendé nan den kamber.
Mayoria di e víktimanan aki ta di edat avansá.
Nan tabata eksigí nan sèn òf oro bou di menasa ku arma di kandela.
Martinus i Eleonora su detenshon a keda suspendé anteriormente pendiente pa nan kaso keda tratá.
Pa loke ta trata Martinus, korte ta akus’é pa poseshon di arma i 3 atrako den bibienda; Penstraat, Mamayaweg, i Martin Luther King Boulvard.
Segun Martinus, el a sinta pòrnada i esei el a bisa for di e promé bia. El a sigui splika ku polisnan a tene entrada hudisial na tur dos kas kaminda e sa keda, pero no a haña nada di atrako ni nada otro di e kosnan ta akus’é di dje.
Martinus a bisa ku e no ta un tiradó di atrako.
Hues a splika ku e akusado Curiel a bisa ku Martinus tabata den e atrakonan ariba menshoná.
Segun Curiel, den e atrako kometé na un bibienda na Marter Luther King na Mari Pampun, e tabata huntu ku Remy, Kevin i Jordi di kual tambe arma a wòrdu usá. Martinus a para riba ku e no ta kuadra ku bèrdat i e no tin nada di aber ku atrako.
Pa loke ta tata e akusado femenino I. Martis, el a bisa ku e ta lamentá ku ta akus’é pa atrako den un bibienda na Toni Kunchi, pasó e tabatin algun prenda ku su frei Wout a regal’é.
Tabata trata di un kadena i armbant ku lo mester a keda hòrtá na e bibienda. Esakinan a wòrdu rekonosé riba “Facebook”. Tabata trata di algun prenda basta balioso. Riba e pregunta di hues ne akusado si su frei tabata taha pa kumpra e prenda nan ei, el a bisa ku Wout ta kue djòp di drecha outo i nunka e no a nota nada sospechoso ku e lo tabata hasi.
Dor ku ta su frei, e no a pensa ku por ta kosnan hòrtá. El a bisa ku el a sinta 5 luna den prizòn pòrnada, el a pèrdè su aña eskolar, a baha di nivel na skol i pa e awor si ta basta.
E ta haña ku mester deklar’é liber di tur akusashon.
Pa loke ta trata Wout hues a bisa ku e tabatin 6 akusashon den su kontra. Curiel a benta nòmber di Wout den 6 atrako. Entre nan esun den e bibienda na Toni Kunchi kaminda e prendanan a wòrdu hòrtá.
Polis a haña un potrèt kaminda Wout tabata pará ku oloshi i kadena riba Facebook. E víktimanan a rekonosé nan prenda nan mesora.
Wout a bisa ku ta prendanan ku semper e tabatin i ku tur hende por tin. No por proba ku ta e víktimanan so tabatin e prendanan.
Wout ninga di a kometé atrako i a bisa ku e ta será inosentemente.
Pa loke ta trata Jeremy Martis e ta keda akusá pa 7 atrako ku Curiel a menshoná su nòmber. Martis a ninga di konos’é Curiel i a bisa ku e no tin nada di aber ku atrako.