WILLEMSTAD,- Presidente di Parlamento Humphrey Davelaar awe a manda un karta na minister di Hustisia Ornelio Martina. Davelaar ta pidi Martina pa investigá insidentenan ku a tuma lugá durante reunion di Parlamento di 4 di yanüari. Manera ta konosí durante e reunion Davelaar a manda polis pa ekspulsá parlamentarionan Gerrit Schotte i Amparo dos Santos i tambe laga polis saka tur hende for di tribuna públiko den Parlamento.
Davelaar ta skirbi den su karta na minister di Hustisia: ‘Manera ta konosí a tuma lugá un insidente durante e reunion di parlamento na kua parlamentario i públiko presente riba tribuna públiko tabata enbolbí.’ Davelaar ta splika minister Martina ku komo presidente ela haña ‘señal’ promé ku e reunion. A base di esaki a puntra polis i servisio di seguridat LBD pa sòru pa fortifikashon di e grupo di polis ku ta vigilá Parlamento. Den e karta Davelaar ta skirbi: ‘No opstante preparashon i akuerdo tokante esaki, na momentu ku tabatin nesesidat di akshon di polis den Staten, no tabatin sufisiente kantidat di polis.’ Segun Davelaar esaki ta un di e motibu pa e insidente den Parlamento a sali fo’i man. Davelaar ta puntra Martina pa duna órden pa un investigashon profundo tokante e insidente di 4 di yanüari den sala di Parlamento i spesialmente tokante ròl di Polis/LBD den esaki.
Davelaar ta bisa ku e ta dispuesto pa tur koperashon nesesario i segun Davelaar esaki ta konta pa personal di Greffir tambe. Greffir por yuda minister ku material, manera oudio, video i otro material di evidensia di dia 4 di yanüari si ta nesesario, segun Davelaar.