David Paulus, diseñador Yu di Kòrsou ku ta bibá na Hulanda, ta kousando furor den medionan oropeo. Dos luna pasá David su kreashonnan kolorido a lusi den British Vogue, loke konsekuentemente a habri mas porta interesante pa nos diseñador lokal. Su historia i trahenan úniko den British Vogue a akapará atenshon di estilista di Glamour Magazine, Esmeralda Schipper, ku kier a usa David su kreashon pa e famoso cover di e revista menshoná. Loke ta hasi e edishon aki asina interesante ta ku Glamour Magazine ta selebrando su di 15 aniversario, pues e edishon tin un balor èkstra den mundu di moda. Pa David ta un honor pa por a lusi su kreashon riba e cover di e revista tan popular, spesialmente riba e edishon di e aniversario. Pa loke ta trata e edishon di British Vogue i e edishon di Glamour Magazine, tur dos ta enfoká riba Black Lives Matter, ku ta e movementu ku a krese mundialmente despues ku George Floyd a ser asesiná na Merka.

“Mi ta sinti ku awor mi tambe ta kai den kategoria haltu di e diseñadornan na Hulanda. Mi ta sumamente orguyoso ku mi trabou duru ta paga. Ta inkreibel pensa ku e impakto di George Floyd a habri porta interesante pa mi den e mundu di moda. Kòrsou ta un isla sumamente talentoso, pues mi ke enkurashá nos hobennan pa nan sigi lucha pa nan soño. No keda pegá den negativisimo, pero kere den bo mes, kere den bo kapasidatnan i bai pe!” David Paulus ta bisa.

 

LAGA UN KOMENTARIO

Please enter your comment!
Please enter your name here