WILLEMSTAD.- Sektor di hospitalidat ta desapuntá ku e suavisashon di e medidanan ku gobièrnu a anunsiá na kuminsamentu di e siman aki. Chata ku ta representá empresarionan den e sektor di hospitalidat a bisa ku gobièrnu di Kòrsou huntu ku dòkter Izzy a hasi un tremendo trabou pa den un tempu rèkert redusí e kantidat di infekshonnan. Banda di esaki, un tremendo trabou i esfuerso ta keda hasí pa oumentá e kantidat di persona bakuná na Kòrsou i CHATA ta sumamente gradesido pa esaki.

E poblashon di Kòrsou i e empresanan a kontribuí bon den esaki. Pueblo a sakrifiká su derechi di libertat i empresanan a karga ku e pèrdida finansiero ku nan a eksperensiá un biaha mas.

Chata ta bisa ku awor ku e situashon ta bou di kòntròl atrobe, industria di turismo, kende ta esun ku te ainda a keda impaktá mas tantu, a spera ku lo a hasi mas esfuerso pa fasilitá turistanan pa biaha pa Kòrsou atrobe.

Ta inkomprendibel kon esaki no a tuma lugá. Chata a spera ku por lo ménos hende por a bai laman atrobe i ku e plachi di dia lo a kita, paso nos tur sa ku esakinan no ta kontribuí (asina tantu) na e oumento di infekshon. A keda probá ku pafó na laman no tin infekshon i sigur no si mantené distansia sosial. Sintá den outo ku un miembro di famia di kas e riesgo di infekshon tampoko no ta mas grandi ku ora bo ta na kas ku otro.

Sinembargo, de-eskalashon di medida sigur lo a yuda pa trese mas turista nos isla.

Banda di esaki e introdukshon di e tèst di antigen tres dia despues di yegada ta inakseptabel. Na promé lugá paso tur hende ku drenta nos pais mester a prueba un resultado negativo di PCR tèst kaba i na di dos lugá, e antigen tèst no ta konfiabel.

Konsekuentemente, si e resultado ta un positivo falsu, e turista i henter su grupo mester bai den karentena obligatorio pa restu di su vakashon. Por último, introdukshon di un tèst adishonal ta pone ku un persona ku ta keda pa un siman, mester hasi mínimo tres pa kuater tèst den korto tempu, kual realmente ta inakseptabel.

Anto ainda no ta papia di e prosedura super kompliká di 3 o 4 diferente aplikashon, e uploading di vários dokumento i pago online pa regla bo dokumentonan di biahe pa Kòrsou. Sin menshoná e fayonan tékniko di e aplikashon aki ku ta pone ku vários biahero a keda pegá na Schiphol i Miami. Un bèrgwensa pa Kòrsou!