Pa rehabilitashon despues di COVID-19

WILLEMSTAD - Durante di e periodo tras di lomba, Kòrsou a konfrontá un oumento drástiko di kontagio di COVID-19. A konsekuensia di esaki tabatin un kantidat grandi di persona interná den kuido intensivo na Curaçao Medical Center (CMC). De SGR-Groep – Revalidatiecentrum Curaçao ta kla pa yuda esnan ku awor mester sigui un proseso di reabilitashon despues di a lucha kontra e vírùs di COVID-19.

Personanan ku keda interná pa largu tempu den kuido intensivo pa motibu di COVID-19, por desaroyá e asina yamá ‘Post-Intensive Care Syndroom’. Un persona ku PICS ta keda konfrontá ku diferente problema den su proseso di rekuperashon. E kehonan mas frekuente ta entre otro problema respiratorio, disminushon di funshonamentu físiko, problemanan kognitivo i/òf problemanan sikológiko.

Den kasonan asina e persona por wòrdu tratá den e sentro di reabilitashon di De SGR-Groep, kaminda e por haña un tratamentu multidisiplinario i na nivel. “Nos tin e ekspertisio i tambe e infrastruktura nesesario pa por duna un tratamentu profeshonal i spesialisá. Den nos klínika di reabilitashon nos a pone algun kama disponibel spesial pa e pashèntnan ‘post-COVID’. Tambe nos ta brinda servisionan poliklíniko na pashèntnan ku por reabilitá for di kas. Ya nos a risibí vários pashènt ‘post-COVID’ durante di e pandemia aki kende a wòrdu tratá eksitosamente.”

Di e forma aki Revalidatiecentrum Curaçao ta sigui aportá na komunidat di Kòrsou, dunando kontinuidat den e kuido despues di COVID-19, ofresiendo tratamentu tantu klíniko i poliklíniko na pashèntnan ‘post-COVID’. “Nos ta kla prepará pa entrante awe dia 18 di mei, nos habri nos portanan bèk pa sigui brinda kuido di kalidat haltu na pueblo di Kòrsou, tantu pa loke ta trata reabilitashon regular komo reabilitashon despues di COVID-19.”

Tur persona ku ta interesá pa wòrdu tratá na e sentro di reabilitashon, por tuma kontakto ku nan via number di telefòn 888-2560 ekstenshon 4448/4557/4583 òf via Whatsapp +5999 513-5916.