WILLEMSTAD.- Inspekshon di Impuesto e siman aki a manda mail na un kliente ku informashon privá di otro kliente. E kliente a aserká EXTRA i a mustra e mail ku informashon privá di kasi 20 kliente.

E kliente dia 31 di desèmber 2021 den oranan di mainta a hasi un petishon pa suspenshon di ‘Indiening aangifte inkomstenbelasting 2019’. Dia 19 di aprel 8.04 or di mainta el a haña kontesta bèk di Inspekshon di Impuesto ku e komunikashon ku e no por haña suspenshon. Den e mail tambe tabatin informashon di kasi binti persona ku a manda mail na Inspekshon di Impuesto den e último dianan di 2021 relashoná ku suspenshon di deklarashon di impuesto.

E mail a asombrá e kliente ku a tuma kontakto ku EXTRA. Na su opinion esaki ta un fayo grandi di Inspekshon. E kliente ta enfatisá ku Inspekshon tin ku garantisá sekreto di informashon di kliente.

Direktor di servisio di impuesto, Jamila Isenia, ta splika EXTRA ku a atendé ku e situashon. Na su opinion e ta toka un fayo humano ku ta hopi lamentabel. ‘Nos ta traha hopi via mail awendia. Klaramente algu a bai robes ku un trahadó ku a respondé riba un mail. Esaki ta algu hopi lamentabel.’ Isenia ta splika ku Inspekshon ta atendé ku esaki pa evitá ku algu asina lo tuma lugá mas den futuro.