WILLEMSTAD.- E asosashon di restorantnan CRA ta mustra nan preokupashon ku e medidanan nobo. E anunsio di e ‘lockdown’ ta pone hopi preshon riba restorantnan, segun e asosashon. Despues di hopi luna di sera tempran, lei seku i un kapasidat máksimo di 50% di okupashon, por papia ku e reservanan a kaba. Anteriormente kaba a sali na kla ku “delivery” no ta un solushon debí na e gastunan haltu. Curbside ta un manera ku e  restorantnan por saka algu di dje, sin tin di hasi demasiado gastu, pero esei tampoko ta posibel. Debí na e medidanan aki hopi restorant lo bai sera nan porta.

Ekonomia di Kòrsou lo haña un sla duru i e sektor di restorant no a haña ni tempu pa por traha reservanan nobo. Ta premirá ku diferente negoshi lo no sobrebibí ku e NOW di 60% i un areglo TVL ku ta bayendo asina poko poko.

Debí na e kresementu di turismo tabatin e speransa pa e sektor di hospitalidat i por a trese e entradanan nesesario/ CRA a komprondé ku tantu KLM komo TUI tin intenshon di bin ku buelonan èkstra den próksimo lunanan. E asosashon ta teme ku debí na e medidanan aki e buelonan aki lo no bai sigui i lo dura un tempu promé ku nos isla por haña hopi turista bèk. E chèns pa rekuperashon lihé ku esaki a bira mas chikí awor.

E asosashon di restorantnan di Kòrsou ke sa dikon no por a bin bèk ku e medidanan manera tabatin na Desèmber i ku a duna bon resultado. CRA ta konsiente di e sirkunstansianan nobo i e mutuashonnan manera e variante britániko pero ta haña e medidanan ekstremadamente pisá pa e sektor di restorant i nan lo sufri ku pèrdida di empleo i lo bai fayit. I e klap pa ekonomia lo tin konsekuensianan grandi.